साउन १३, सर्लाही / सुकुमाया फाउन्डेसनले जिल्लाको हरिवन नगरपालिका वडा नम्बर २ मा रहेको अति विपन्न १०० परिवारलाई झुल तथा छाता वितरण गरेको छ । तराइ क्षेत्रमा गर्मीको चाप बढे सँगै स्थानीयहरूलाई लु लाग्ने, लामखुट्टेको विगविगी बढ्ने र यसबाट विभिन्न प्राणघातक रोग समेत लागेर धेरैको मृत्युसमेत हुने भएकोले फाउन्डेसनले झुल तथा छाता वितरण गरेको हो ।

              फाउन्डेसनकी अध्यक्ष सुकुमाया मोक्तानको अध्यक्षतामा सम्पन्न झुल तथा छाता वितरण कार्यक्रमको प्रमुख आतिथ्यता वडाध्यक्ष अर्जुन महतोले गर्नु भएको थियो भने विशेष अतिथि वाइबा समाज नेपालका अध्यक्ष बिगेन्द्र सिङ वाइबा हुनुहुन्थ्यो ।

               गर्मीको मौसममा विशेषगरि तराइ क्षेत्रमा अत्याधिक गर्मी हुने, लु लाग्ने त्यस्तै लामखुट्टेको बिगबिगी असाध्यै बढ्ने र यसको टोकाईबाट बर्षेनी सयौं मानिस प्रभावित हुने गर्दछ । लामखुट्टेका कारण सयौं मानिस औंलो, हात्तिपाइले आदि जस्ता रोगबाट प्रभावित हुने र डेंगु, कालाजार जस्ता प्राणघातक रोगबाट मृत्यु समेत हुने हुनाले यसको रोकथामका लागि अति विपन्न १०० परिवारलाई झुल तथा छाता वितरण गरिएको सुकुमाया फाउन्डेसनकी अध्यक्ष सुकुमाया मोक्तानले धादिङन्युजलाई बताउनु भयो ।

                 सुकुमाया फाउन्डेसनले “मिसन ताइस्या” मार्फत अति विपन्न माइली स्याङ्तानलाई केहि जग्गा खरीद र घर समेत बनाइदिसकेको छ । दोश्रो मिसन अनुरुप ताइस्याकी छोरी वर्ष १० कि माया तामाङ र सोहि वडाकी अर्की १२ वर्षकी प्रमिशा माझीको पालनपोषण तथा पठनपाठनको समेत जिम्मा लिएको छ । यथाशिघ्र उनीहरुलाई विद्यालय भर्ना गराउने अध्यक्ष मोक्तानले बताउनु भयो ।

                   यस क्षेत्रका अधिकतम मानिसहरु कृषि पेशामा आश्रित छन् भने आयश्रोत अत्यन्तै न्युन रहेको छ ।