धादिङमा ४२ सय विद्युत् पोल जीर्ण
853 पटक पढिएको
धादिङ, – धादिङमा विद्युत् उपयोगको इतिहास धेरै लामो नभए पनि जीर्ण पोलको संख्या निकै धेरै छ । जिल्लाका ३९ गाविस र १ नगरपालिकाका ४७ हजार परिवारले मात्र अहिलेसम्म विद्युत् सेवा पाएका छन् । विद्युत् सेवा पाएकाहरूले पनि निर्धक्क भएर उपयोग गर्न पाएका छैनन् । कारण हो, घरनजिक रहेको काठको पोल जीर्ण हुनु ।
घरनजिकै रहेको विद्युत् पोल ढलेर बटुवा र आफ्नो घरमा करेन्ट लाग्ला भनेर पिण्डा–१, मिलनटारकी सावित्रा घिमिरेलाई फागुन लागेदेखि नै चिन्ता छ । विद्युत् सब–स्टेसन जरेखेतबाट एक किलोमिटर दूरीमा उनको घर छ । ४ वर्षदेखि पोल जीर्ण भएको खबर गरे पनि पोल नफेरिँदा सामान्य हावाहुरीमा पनि ढल्ने अवस्था रहेको उनले बताइन् ।
जिल्लाभित्र ३३ केभी लाइनमा रहेको स्टिल पोलसंख्या ८६२ थान, एचटी (११००० भी) लाइन रहेको स्टिल पोल संख्या ५ हजार ८०० थान र एलटी (४००/२२० भी) लाइन रहेको पोल संख्या १० हजार ९०० छन् । तीमध्ये ६ हजार ४०० स्टिल पोल र ४ हजार ५०० काठका पोल छन् । अहिलेसम्म वितरण गरिएको एचटी लाइन दूरी ५२७ किलोमिटर, एलटी लाइन दूरी १ हजार ४५२ किलोमिटर र ३३ केभी लाइन दूरी ६६.४ किलोमिटर रहेको तथ्यांक छ कारोबार डेलि डट कममा खबर छ ।
जिल्लाभरका ४ हजार ५०० काठका पोलमध्ये ४ हजार २०० जीर्ण रहेको धादिङ वितरण केन्द्रका प्रमुख सत्यनारायण गामीले बताए । उनका अनुसार काठको पोल विस्थापन गर्न एलटी स्टिल पोल १३ हजार ५०० रुपैयाँ र ढुवानी र पोल सेट गर्न २ हजार २५० रुपैयाँ गरी प्रतिपोल १५ हजार ७५० रुपँया खर्च लाग्छ । यसअनुसार ४ हजार २०० काठका पोल विस्थापन गर्न ६ करोड ६१ लाख ५० हजार लाग्छ । जिल्लालाई अहिलेसम्म प्रतिवर्ष १५० थान काठका पोल विस्थापन गर्ने कार्यक्रम आएको छ ।
