तेल अभिभ । हमासले शनिबार बिहान गरेको घातक रकेट आक्रमणमा परी शार हानेगेभ क्षेत्रीय काउन्सिलका प्रमुख (मेयर) ओफिर लिब्स्टेनको मृत्यु भएको स्थानीय स्रोतलाई उद्धृत गर्दै टाइम्स अफ इजरायलले जनाएको छ ।

“आतंकवादीको आक्रमणको बेला सहरको रक्षा गर्न गएका ओफिर मारिए,” काउन्सिलको विज्ञप्तिलाई उद्धृत गर्दै समाचारमा भनिएको छ । उनको मृत्युपछि काउन्सिलका उपप्रमुख योसी केरेनलाई अन्तरिम प्रमुख बनाइएको छ ।

हमासको रकेट आक्रमणमा परी कम्तीमा पाँचजनाको मृत्यु भएको र १०० भन्दा बढी घाइते भएका छन् ।

मध्य तथा दक्षिण इजरायलमा शनिबार बिहान साढे तीन घण्टासम्म व्यापक रकेट हमला गरिएको थियो । यसबाहेक हमासले पाँच इजरायल डिफेन्स फोर्स (आईडीएफ)का सैनिकलाई अपहरण गरेको दाबी गरेको जेरुसेलनम पोस्टले जनाएको छ । आईडीएफले भने त्यसको पुष्टि गरेको छैन ।

हमासको आक्रमणपछि आईडीएफले गाजापट्टीमा जवाफी हमला गरेको छ । रासस/एएनआई