भुमेस्थान लिलाकालीमाविका विद्यार्थीहरु काम्न थालेपछि पढाई प्रभावित

धादिङ– असोज धादिङको भुमेस्थान गाउँ विकास समितिमा रहेको लिलाकाली माध्यमिक विद्यालयमा अध्ययन गर्ने विद्यार्थीहरुमा अनौठो समस्या देखीन थालेको छ । विद्यालयमा अध्ययनरत धेरै विद्यार्थी एकैसाथ बिरामी पर्ने गरेका छन । बिरामी विद्यार्थीले आफ्नो होस गुमाएर रुख चढ्न थालेपछि शिक्षक तथा अभिभावक चिन्तित भएका छन । बिरामी विद्यार्थीलाई कसैले नियन्त्रण गर्न नसक्ने र उनीहरु सबैलाई पन्छाएर रुखमा चढ्ने गरेको शिक्षकले बताएका छन् । रुखचढेका विद्यार्थी लडेर केही भयो भने के गर्ने रु भन्ने चिन्ताले शिक्षक तथा अभिभावकलाई सताउने गरेको छ । विद्यार्थीमा देखिएको यस्तो समस्याका कारण लिलाकालि माविको पठन पाठन नै प्रभावित भएको छ । कक्षामा पढिरहेका विद्यार्थीमा गएको एक महिनादेखि एकोहोरो हेर्ने, काम्ने, चिच्याउने र रुखमा चढ्ने समस्या देखिने गरेको विद्यालयका प्रधानाध्यापक नवराज थापाले बताउनुभयो । रुख चढेका केहीलाई अन्य विद्यार्थी र शिक्षकले सुरक्षित रुपमा तल झारे । एक जना छात्रा भने रुखबाट खसेर गम्भीर घाइते भएकी छन । उनको खुट्टा भाँचिएकोले उपचार भैरहेको विद्यालयका प्रधानाध्यापक थापाले जानकारी दिनुभयो । कक्षा ७, ८ ९ का छात्राहरुलाई देखिएको समस्या नियन्त्रण गर्न शिक्षकहरु लागि पर्दा विरामी परेका विद्यार्थीहरुले शिक्षकहरुको कपडा समेत च्यातेको थापाको भनाई छ । मास हिस्टेरियाको रुपमा रहेको यो समस्या देखिने वित्तिकै विद्यार्थीलाई अस्पताल पठाउने गरेको प्रधानाध्यापक थापाको भनाई छ ।