धादिङ–डाक्टर जस्तो अति संवेदनशील पेशामा संलग्न रहेको व्यक्तिनै नक्कली शैक्षिक योग्यता देखाएर उपचारमा संलग्न रहेको खुलासा भएपछि धादिङको राजमार्ग क्षेत्रमा संचालित अस्पताल शंकाको घेरामा परेको छ । शुक्रवार धादिङको गजुरी स्थित निजी अस्पतालबाट एक नक्कली चिकित्सक पक्राउ परेपछि अस्पतालको नाममा सर्वसाधरणको ज्यान खतरामा पारेर व्यवसायीहरुले लुटिरहेको खुलासा भएको हो ।
अरूलाई परीक्षा दिन लगाएर एमबिबिएस उत्तीर्ण गरेका नक्कली चिकित्सकहरू देशभरिका अस्पतालमा कार्यरत रहेको खुलेको छ । काठमाडौं तथा तराईका विभिन्न अस्पतालमा कार्यरत १३ जना त्यस्ता नक्कली चिकित्सकलाई प्रहरीले पक्राउ गरेको छ ।एसएलसी र प्लस टुको नक्कली सर्टिफिकेट बनाउने, त्यसैको आधारमा चीनमा एमबिबिएस पढ्ने र नेपालको लाइसेन्स परीक्षामा अरूलाई जाँच दिन लगाएर पास गरेर डाक्टर हुनेलाई नेपाल प्रहरीको केन्द्रीय अनुसन्धान ब्युरो (सिआइबी) ले पक्राउ गरेको हो ।