ज्यालामजदुरी गरेर परिवार पालिरहेकाले सामान्य घरखर्च चलाउन पनि मुस्किल परिरहेका बेला सीपमूलक तालिम लिएपछि उनीहरू आत्मनिर्भर बन्न थालेका छन् । अहिले उनीहरू घरमै बसी विहानबेलुकाको समय सदुपयोग गरेर सादा कपडामा बुट्टा भरेर दैनिक घरखर्च चलाउन सक्ने भएका छन् । गरिबी निवारणका लागि लघु उद्यम विकास कार्यक्रममार्फत सीपमूलक तालिम लिएपछि धादिङको गल्छी गाउँपालिकाका विपन्न समुदायका व्यक्ति आत्मनिर्भर बन्न थालेका हुन् ।
धादिङ : सबैको हातहातमा बुट्टा भर्ने सियो र साथमा गोलो कपडा बाध्ने रिङ छ । सबैजना आ–आफ्नै सुरमा कपडामा बुट्टा भरिरहेका छन् । धादिङको गल्छी गाउँपालिका बडा नं ७ स्थित बाइसकिलोमा आजभोली हरेक घरमा यस्तो दृष्य देख्न पाइन्छ । पृथ्वी राजमार्गसँग जोडिएको बाइसकिलोमा विपन्न बस्ती छ । २३ घरधुरी रहेको उक्त बस्तीका अधिकांश परिवारको कमाइको कुनै स्थायी स्रोत छैन ।