काठमाडौं । इंग्लीश प्रिमियर लिग फुटबलमा एस्टन भिल्लाले म्यान्चेस्टर सिटीलाई १–० ले हराएको छ ।
बुधबार राति आफ्नै मैदानमा भएको खेलमा एस्टन भिल्लालाई विजयी गराउन लियोन बेइलीले निर्णायक गोल गरे । यो जितसँगै एस्टन भिल्ला अंक तालिकाको तेस्रो स्थानमा उक्लिएको छ भने म्यान्चेस्टर सिटी चौँथो स्थानमा झरेको छ ।
गएराति भएको अर्को खेलमा म्यान्चेस्टर युनाइटेडले चेल्सीलाई २–१ ले हराउँदा लिभरपुलले शेफिल्ड युनाइटेडमाथि २–० को जित निकाल्यो ।
यसैगरि फुल्हमले नटिङ्घम फरेष्टलाई ५–० ले पराजित गर्दा ब्राइटनले ब्रेन्टफोर्डलाई २–१ ले तथा बर्नमाउथले क्रिष्टल प्यालेसलाई २–० ले पराजित गरे ।
बुधबार राति भएका खेलपछि प्रिमियर लिगको अंक तालिकामा १५ खेलबाट ३६ अंक जोडेको आर्सनल शीर्ष स्थानमा छ । ३४ अंक जोडेको लिभरपुल दोस्रो स्थानमा रहँदा ३२ अंकसहित एस्टन भिल्ला तेस्रो स्थानमा उक्लिएको छ । ३० अंक बटुलेको म्यान्चेस्टर सिटी चौथो स्थानमा झरेको छ ।