जंगली जनावरको आक्रमणबाट पूर्वी नवलपरासीमा २ जनाको मृत्यु

काठमाडौं । जंगली जनावरको आक्रमणबाट पूर्वी नवलपरासीमा दुई जना महिलाको मृत्यु भएको छ ।

विनयीत्रिवेणी गाउँपालिका–१ मा सासूबुहारीको मृत्यु भएको छ । घाँस काट्न विनय सामुदायिक वनमा गएका ६० वर्षीया सासु मनादेवी पौडेल र २८ वर्षीया बुहारी विष्णु पौडेल मृत अवस्थामा फेला परेको प्रहरीले जनाएको छ ।

जिल्ला प्रहरी कार्यालय पूर्वी नवलपरासीका डिएसपी बेदबहादुर पौडेलका अनुसार हिजो दिउँसो दुई जना महिला जंगलमा घाँस काट्न गएको र राति अबेरसम्म नफर्किएको सूचनाको आधारमा खोजतलास गर्दा गए राति दुई जना महिलाको शव फेला परेको हो ।

कम्बरमा चोट लागेको र घटनाको प्रकृति हेर्दा जंगली जनावरले आक्रमण गरेको हुन सक्ने प्रारम्भिक अनुमान प्रहरीले गरेको छ । स्थानीयले भने बाघको आक्रमणबाट दुवै जनाको मृत्यु भएको बताएका छन् ।