रञ्जन अधिकारी
पोखरा,

पोखराको फेवाताल किनारमा रहेको रेष्टुरेण्टलाई पहिरोले बगाउँदा तीन युवाको ज्यान गएको छ । एक जना बेपत्ता छन् । कास्कीको पुम्दीभुम्दी– १, अनदु स्थित फेवातालको किनारमा सञ्चालित टिपिकल रेष्टुरेण्ट एण्ड लज आईतवार राति पहिरोसँगै बगेको हो । मृत्यु हुने तथा हराउने सबै त्यहाँ कार्यरत मजदुर हुन् ।

पहिरोमा पुरिएका धादिङ कल्लेरीका २२ बर्षिय राम मगर, ओखलढुङ्गा गामलाङटारका २८ बर्षिय प्रकाश मगर, र सिन्धुली आङसाङ–९ का १८ बर्षिय मोहन मगरको शब पहिरोले पुरेको अवस्थामा निकालिएको कास्की प्रहरी प्रमुख प्रहरी उपरिक्षक बसन्त कुमार लामाले जानकारी दिए । रेष्टुरेण्ट सञ्चालक रामेछाप सैवु ६ का गोकुल मगरका भाई १८ बर्षिय भुवन मगरको अवस्था भने अज्ञात रहेको छ । सोमबार दिनभर सुरक्षाकर्मी टोलीले खोजी गरेपनि राति अबेरसम्म उनको पत्ता लाग्न सकेन । मृतक तीन जनाको शव पोष्टमार्टमका लागि पश्चिमाञ्चल क्षेत्रीय अस्पतालमा राखिएको अस्पतालका प्रहरी हवल्दार सुजन घिमिरेले जानकारी दिए । मृतकका परिवार पोखरा आईनसकेको उनले बताए ।

आईतबार रातभर मुसलधारे बर्षासँगै आएको पहिरोेबारे उज्यालो भएपछि मात्रै जानकारी पाएको स्थानीयबासीले बताए । पहिरोमा परेकाको उद्धारको लागि प्रहरी, शसस्त्र, नेपाली सेना तिन ओटै सुरक्षा फौजका सय भन्दा धेरै बिहानैदेखि खटिएका थिए । ताल पारी रहेकाले घटनास्थलसम्म उद्धार टोली आवातजावतको लागि शसस्त्र प्रहरी र नेपाली सेनाको मोटरबोट प्रयोग गरिएको थियो ।

होटल सञ्चालक गोकुल मगर भने राति तालवारी रहेकाले बाच्न सफल भएका छन् । तालको करिब ५ मिटर मात्रै दुरीमा स्थानीय बत्तीबहादुर गुरुङ्गको घरमा मगरले बिगत आठ बर्षदेखि रेष्टुरेन्ट सञ्चालन गर्दै आएका थिए । पहिरोबाट ३ कामदार सहित भाई गुमाएका उनले आफ्नो मात्रै झण्डै ७० लाख रुपैयाँको क्षति भएको बताएका छन् ।

यसैबीच, नजिकैबाट पहिरो गएपछि प्रमुख पर्यटकीय गन्तव्य मध्येको एक विश्व शान्ति स्तुपा पनि खतरामा परेको छ । स्तुपा प्राङ्गणको पर्खाल भन्दा पाँच फिट नजिकै पहिरो गएकाले तत्काल संरक्षणको पहल नभए थप वर्षा भएमा पहिरोले पर्खालै भेट्ने स्थानीयबासीले बताएका छन् । बर्षाको समयमा पानी बग्ने खोल्सो अतिक्रमण गरी ताल किनारमै संभाबित जोखिमको ख्यालै नगरी संरचना बनाएकाले यति ठुलो क्षति भएको जानकारहरु बताउँछन् ।

यस्तै, आईतबार रातिको भिषण बर्षाको कारण पुम्दीभुम्दी गाविसको वडा नं. १ मै माथिबाट आएको पहिरोले घर पुर्दा तीन जना घाइते भएका छन् । पहिरोमा परी १४ वर्षका कवि गुरुङ , प्रणेश गुरुङ र १८ वर्षका सुर्य गुरुङ घाइते भएको जिल्ला प्रहरी कार्यालय कास्कीले जनाएको छ । घाइतेहरुको पोखराको नमस्ते अस्पतालमा उपचार भइरहेको छ । त्यस्तै पोखरा उपमहानगरपालिका – ६ बुलौदी स्थित स्थानिय बुलौदी खोला किनारको जमिन भाँसिदा दुई ओटा घर जोखिममा परेका छन् । आईतवार राति भएका यी सबै घटना पहिल्यै जोखिम क्षेत्र भित्र थिए । मुख्यतः गुप्तेश्वर महादेव गुफा माथिका संरचना सहित संकटग्रस्त क्षेत्र भनि पहिल्याएका पोखराका अन्य स्थानमा बसेका बस्तीबारे समयमै सोच्नु जरुरी छ ।