स्रोतका अनुसार गृह मन्त्रालय दिने यसअघिको सहमतिबाट कांग्रेस पछि हटेको भन्दै सरकारमा सहभागी नहुन नेताहरुले अध्यक्ष झलनाथ खनाल र संसदीय दलका नेता केपी ओलीलाई दवाब दिएका छन् । उनीहरुले कच्चा सम्झौता गरेको भन्दै नेतृत्वको आलोचना पनि गरेका छन् । एमाले सचिव शंकर पोखरेलले गृह मन्त्रालय दिने सहमतिबाट कांग्रेस पछि हटे आफूहरु सरकारबाहिर बस्ने सम्भावना रहेको ओएनएस न्यूजलाई बताए ।

‘गृह मन्त्रालय एमालेलाई दिने सहमति हिजो भएको हो’ बैठकबारे उनले भने, ‘त्यसबाट कांग्रेस पछि हट्यो भने हामी सरकारमा जान सक्दैनौ । अहिले यसैबारे छलफल भइरहेको छ ।’ उनले सरकारमा नगएपनि सरकारलाई दिएको समर्थन कायमै रहने बताए ।

स्रोतका अनुसार कांग्रेसले प्रधानमन्त्रीलाई सरकार चलाउन सहज हुने भएकोले गृह मन्त्रालय आफैसँग राख्ने जनाएको हो । ‘माधव नेपाल प्रधानमन्त्री हुँदा पनि हामीले उहाँलाई गृह, अर्थ सहितका प्रधानमन्त्री दिएका हौँ’ कांग्रेसका एक नेताले भने, ‘यसपटक पनि प्रधानमन्त्रीलाई सरकार चलाउन सहज होस भनि गृह राख्न खोजिएको हो ।’