बैतडी ।बैतडीको पुर्चौंडी नगरपालिकामा भएको जन्ती बोकेको बस दुर्घटनामा ज्यान गुमाउनेको सङ्ख्या १३ पुगेको छ। बिहीबार राति भएको उक्त भयानक दुर्घटनामा ८ जनाको घटनास्थलमै र अन्य ५ जनाको डडेल्धुरा अस्पतालमा उपचारका क्रममा मृत्यु भएको हो।

पुर्चौंडी नगरपालिका–७ भवनेबाट जन्ती लिएर बझाङतर्फ जाँदै गरेको सुप प्र ०२ ००१ ख १११९ नम्बरको बस पुर्चौंडी–७ बडगाउँ मोडमा दुर्घटनामा परेको थियो। बैतडीका प्रहरी प्रमुख दीपककुमार रायका अनुसार दुर्घटनामा परी ज्यान गुमाउनेहरूमा बझाङ र बैतडीका नागरिक रहेका छन्।

यसैगरी, डडेल्धुरा अस्पतालमा उपचारका क्रममा बझाङ बित्थडचिर–७ का १७ वर्षीय विसनदत्त जोशी, २८ वर्षीय दीपकराज जोशी र ४६ वर्षीय किसनदत्त जोशीको मृत्यु भएको छ। साथै बझाङ केदारस्यु–७ का २७ वर्षीय केशवराज भट्ट र बैतडी पुर्चौंडी–७ का १५ वर्षीय सुशील जोशीको पनि उपचारकै क्रममा निधन भएको प्रहरीले जनाएको छ।

दुर्घटनामा अन्य ३४ जना घाइते भएका छन्। घाइतेहरूको डडेल्धुरा, धनगढी र बझाङका विभिन्न अस्पतालहरूमा उपचार भइरहेको छ।  उक्त बसमा वर-वधु (बेहुला-बेहुली) सवार नभएका कारण उनीहरू सुरक्षित रहेका छन्।