काठमाडौं । हाल देशभर मनसुनी वायुको आंशिकदेखि पूर्ण प्रभाव रहँदा जनजीवन प्रभावित भएको छ। जल तथा मौसम विज्ञान विभाग, मौसम पूर्वानुमान महाशाखाका अनुसार मनसुनको न्यूनचापीय रेखा अहिले सरदर स्थानभन्दा केही माथि नेपालको तराई भू-भाग नजिक अवस्थित रहेकाले मुलुकभर मौसमी गतिविधि बढेको हो।

महाशाखाले जारी गरेको हालैको बुलेटिनअनुसार आज देशभर साधारणतया बदलीको अवस्था रहेको छ। अहिले कोशी, बागमती, गण्डकी र लुम्बिनी प्रदेशका केही स्थानहरूका साथै कर्णाली प्रदेशका एक-दुई स्थानमा हल्कादेखि मध्यम वर्षा भइरहेको छ।

आज दिउँसो पनि देशभर साधारणतया बादल लागिरहने मौसमविद्हरूले बताएका छन्। यस क्रममा कोशी, बागमती र गण्डकी प्रदेशका हिमाली भू-भागका केही स्थानहरू तथा लुम्बिनी, कर्णाली र सुदूरपश्चिम प्रदेशका हिमाली क्षेत्रका केही स्थानमा मेघगर्जन र चट्याङसहित मध्यमसम्मको वर्षा र हिमपातको सम्भावना देखिएको छ। त्यस्तै, देशका पहाडी तथा तराई भू-भागका धेरै स्थानमा मेघगर्जन र चट्याङसहित हल्कादेखि मध्यमसम्मको वर्षा हुने महाशाखाले जनाएको छ। विशेष गरी कोशी, बागमती, गण्डकी र लुम्बिनी प्रदेशका पहाडी भू-भाग तथा मधेस, बागमती, गण्डकी र लुम्बिनी प्रदेशका तराई क्षेत्रका एक-दुई स्थानमा भारी वर्षाको समेत सम्भावना रहेको छ।

मौसममा आउने यो परिवर्तन रातिको समयमा पनि जारी रहने देखिएको छ। राति देशभर साधारणतया बदली रही कोशी, बागमती र गण्डकी प्रदेशका हिमाली भू-भागका केही स्थान तथा लुम्बिनी, कर्णाली र सुदूरपश्चिमका हिमाली क्षेत्रका एक-दुई स्थानमा मेघगर्जन र चट्याङसहित वर्षा र हिमपातको आकलन गरिएको छ। रातिको समयमा देशका पहाडी र तराई भू-भागका केही स्थानमा मध्यमसम्मको वर्षा हुनुका साथै कोशी प्रदेशका पहाडी क्षेत्र र कोशी तथा लुम्बिनी प्रदेशका तराई भू-भागका एक-दुई स्थानमा भारी वर्षा हुन सक्नेछ।

कोशी, मधेस, बागमती, गण्डकी र लुम्बिनी प्रदेशका विभिन्न हिस्सामा भारी वर्षाको उच्च सम्भावना रहेकाले महाशाखाले विशेष सतर्कता सम्बन्धी सार्वजनिक सूचना जारी गरेको छ। ती क्षेत्रहरूमा हुन सक्ने गेग्रान बहाव, बाढी, पहिरो तथा भूक्षयजस्ता प्राकृतिक प्रकोपको जोखिम वा क्षतिबाट बच्न महाशाखाले आग्रह गरेको छ। वर्षाका कारण ती क्षेत्रहरूमा दैनिक जनजीवनलगायत कृषि, स्वास्थ्य, पर्यटन, पर्वतारोहण, सडक तथा हवाई यातायात समेत प्रभावित हुन सक्ने भएकाले आवश्यक पूर्वतयारी र सतर्कता अपनाउन मौसम पूर्वानुमान महाशाखाले सम्पूर्ण सर्वसाधारण तथा सरोकारवाला निकायसँग अनुरोध गरेको छ।