धादिङ, कात्तिक ८ । बागमती प्रदेशका आर्थिक मामिला तथा योजनामन्त्री एवं नेपाली कम्युनिस्ट पार्टीका बागमती प्रदेश समिति संयोजक सरल सहयात्री पौडेल आइतबार धादिङका विभिन्न कार्यक्रममा सहभागी हुनुभएको छ। उहाँले नीलकण्ठ नगरपालिका–१४, धुवाकोटस्थित कुपा समाजको नवनिर्मित भवन उद्घाटन गर्नुका साथै खेलकुद प्रतियोगिताको समापन, सहिद परिवारसँग भेटघाट तथा सम्मान र पार्टी कार्यकर्तासँग भेटघाट गर्नुभएको हो।

मन्त्री पौडेलले धुवाकोटस्थित कुपा समाजको नवनिर्मित भवन उद्घाटन गर्नुभएको छ। भवन निर्माण भएपछि स्थानीयस्तरमा सामाजिक तथा सामुदायिक कार्यक्रम सञ्चालन गर्न सहज हुने अपेक्षा गरिएको छ।

भवन उद्घाटनपछि उहाँ कुपामा आयोजित छैटौँ ७ ए साइड खुला नकआउट फुटबल प्रतियोगिता तथा मिनी म्याराथन प्रतियोगिताको समापन कार्यक्रममा सहभागी हुनुभयो। खेलकुद प्रतियोगिताले स्थानीय खेलाडीको प्रतिभा प्रस्फुटन, खेलकुदप्रतिको आकर्षण वृद्धि तथा सामुदायिक सम्बन्ध सुदृढ गर्न सहयोग पुग्ने अपेक्षा गरिएको छ।

कुपा जाने क्रममा मन्त्री पौडेलले नीलकण्ठ नगरपालिका–१४ को पात्ले, धुवाकोटमा सहिद परिवारसँग भेटघाट तथा सम्मान कार्यक्रमसमेत गर्नुभएको थियो। नेपाली कम्युनिस्ट पार्टीको बागमती प्रदेश समिति संयोजकसमेत रहनुभएका पौडेलले सहिद परिवारसँग भेटघाट गर्नुभएको हो।

यसैगरी, मन्त्री पौडेललाई धादिङबेसीस्थित नेपाली कम्युनिस्ट पार्टीको जिल्ला पार्टी कार्यालयमा स्वागत तथा भेटघाट गरिएको थियो। कार्यक्रममा पार्टीका नेता तथा कार्यकर्तासँग भेटघाट भएको जनाइएको छ।

मन्त्री पौडेलले धादिङबेसीमा सहिद स्मृति सञ्चार सहकारी संस्थाद्वारा सञ्चालित रेडियो बिहानीको समेत अवलोकन गर्नुभएको थियो।

आइतबार धादिङमा भएका यी कार्यक्रममार्फत मन्त्री पौडेलले सामुदायिक पूर्वाधार, खेलकुद, सहिद परिवारसँगको सम्बन्ध तथा पार्टी संगठनसँग सम्बन्धित गतिविधिमा सहभागिता जनाउनुभएको छ।A