धादिङ, २१ चैत ।धादिङ जिल्लामा क्रियाशील पत्रकारहरूलाई आधुनिक प्रविधिको प्रयोगमार्फत दक्ष बनाउने उद्देश्यले पत्रकारितामा आर्टिफिसियल इन्टेलिजेन्स अर्थात कृत्रिम बौद्धिकताको प्रयोग सम्बन्धी एक दिवसीय अभिमुखिकरण कार्यक्रम शुक्रवार धादिङबेसीमा सम्पन्न भएको छ ।

बागमती प्रदेशको आन्तरिक मामिला तथा कानुन मन्त्रालयको आयोजना तथा नेपाल पत्रकार महासंघ बागमती प्रदेश र धादिङ शाखाको सहकार्यमा आयोजित उक्त कार्यक्रममा प्रविधिको विकाससँगै पत्रकारिता क्षेत्रमा भित्रिएका नयाँ आयामबारे विस्तृत छलफल गरिएको थियो ।

कार्यक्रममा प्रशिक्षकद्वय अजय शर्मा र राजन न्यौपानेले डिजिटल साक्षरता, सुरक्षित सर्च इन्जिनको पहिचान र एआईलाई सही निर्देशन दिएर समाचार सामग्री उत्पादन गर्ने तरिकाबारे व्यावहारिक ज्ञान प्रदान गर्नुभएको थियो ।

पछिल्लो समय विश्वभर चर्चामा रहेको एआई प्रविधिले पत्रकारको कार्यक्षमता बढाउन, समाचार संकलनलाई छिटो छरितो बनाउन र सामग्रीको गुणस्तर सुधार्न निकै सहयोग पुग्ने प्रशिक्षकहरूको भनाइ थियो ।

विशेषगरी लामो लेख वा अन्तर्वार्तालाई संक्षेपीकरण गर्न, भाषागत शुद्धता कायम गर्न, सूचनाको विश्लेषण गर्न र विभिन्न भाषामा रहेका सामग्रीलाई तुरुन्तै अनुवाद गरी प्रयोग गर्न एआई निकै प्रभावकारी देखिएको छ । यसका साथै समाचारका लागि आवश्यक पर्ने तस्विर र भिडियो उत्पादनमा पनि यो प्रविधिले पत्रकारको समय र श्रमको बचत गर्ने बताइएको थियो ।

जिल्ला समन्वय समिति धादिङका उप प्रमुख कलमान विकको प्रमुख आतिथ्यमा सम्पन्न कार्यक्रममा बोल्दै वक्ताहरूले प्रविधिले चुनौती र अवसर दुवै ल्याएको चर्चा गर्नुभयो । प्रमुख जिल्ला अधिकारी विजयराज सुवेदी र मन्त्रालयका महाशाखा प्रमुख पदम ओझाले पत्रकारहरू प्रविधिमैत्री बन्नुको विकल्प नरहेको बताउनुभयो । पत्रकार महासंघ बागमती प्रदेशका अध्यक्ष कृष्ण सारु मगरको अध्यक्षतामा भएको उद्घाटन सत्रमा केन्द्रीय प्रतिनिधि केशव अधिकारी र धादिङ शाखाका अध्यक्ष सीताराम अधिकारीले तालिममा सिकेको सीपलाई व्यवहारमा उतार्न सके मात्र समाचारको विश्वसनीयता बढ्ने र पाठकको मन जित्न सकिने धारणा राख्नुभयो ।

एआईको प्रयोगले तथ्याङ्क पत्रकारितालाई सहज बनाउने, फेक न्युज वा भ्रामक सूचनाको पहिचान गर्न सघाउने र पत्रकारलाई नयाँ विषयवस्तु खोज्न प्रेरित गर्ने भएकाले यो कार्यक्रम धादिङका पत्रकारका लागि फलदायी भएको सहभागीहरूले बताएका छन् । मन्त्रालयकी अधिकृत रविता कार्की लगायतको उपस्थिति रहेको सो कार्यक्रममा पत्रकारहरूले प्रविधिको प्रयोग गर्दा पत्रकारिताको मूल्य र मान्यतालाई जोगाउँदै सत्य र तथ्यपरक सूचना प्रवाहमा जोड दिने प्रतिबद्धता समेत जनाएका छन् ।