काठमाडौं, १३ असोज  – देशभर मौसममा उल्लेख्य सुधार आएको छ। जल तथा मौसम विज्ञान विभाग, मौसम पूर्वानुमान महाशाखाका अनुसार हाल मनसुनको न्यून चापीय रेखा सरदर स्थानको आसपास अवस्थित रहेको छ भने देशभर मनसुनी वायु र पश्चिमी वायुको आंशिक प्रभाव कायम छ।

आज दिउँसो देशभर आंशिक बदली (बादल) लाग्ने देखिएको छ। महाशाखाका अनुसार देशका हिमाली र पहाडी भू-भागका एक–दुई स्थानमा हल्का वर्षा र हिमपात हुने सम्भावना रहेको छ।

हालको मौसमी प्रणालीको प्रभावका कारण देशका हिमाली भू-भागमा आंशिक बादल लागेको छ भने पहाडी र तराईका भू-भागमा मौसम मुख्यतया सफादेखि आंशिक बदली रहेको छ।

आगामी दिनहरूमा पनि मौसमको अवस्थालाई हेरेर आवश्यक सतर्कता अपनाउन महाशाखाले अनुरोध गरेको छ।