काठमाडौंः एसियाली फुटबल महासंघ (एएफसी)ले अखिल नेपाल फुटबल संघ (एन्फा) लाई १० हजार अमेरिकी डलर जरिवाना गरेको छ ।

मलेसियाको क्वालालाम्पुरस्थि एएफसीको केन्द्रिय कार्यालयमा बसेको अनुशासन तथा आचार समितिको बैठकले एन्फालाई १० हजारको आर्थिक जरिवाना गर्ने निर्णय गरेको हो ।

गलत तरिकाले क्लबहरुलाई लाईसेन्स वितरण गरेको भन्दै एन्फामाथि जरिवाना तिराउने निर्णय गरेको एएफसीले जनाएको छ ।

फिफाले एएफसीले सन् २०१९ भित्र आफ्ना सदस्य राष्ट्रलाई क्लब लाईसेन्सिङ प्रणाली लागु गर्न भनेको थियो ।

सोही अनुसार एन्फाले ए डिभिजन लिग खेल्ने ९ क्लबलाई लाईसेन्सका लागि प्रस्ताव गरेको थियो ।

सोही अनुसार एएफसीले नेपालका ९ क्लबलाई क्लब लाईसेन्स प्रदान गरेको थियो ।

एएफसीले क्लब लाईसेन्स पाएका टिमलाई मात्र एएफसीको आधिकारिक प्रतियोगितामा सहभागीता गराउदै आएको छ ।

सोही अनुसार २०७५ को लिग च्याम्पियनको हैसियतमा मनाङ मस्र्याङ्दी क्लबले एएफसी कप खेलेको थियो ।

होम एण्ड अवेका आधारमा खेलिएको एएफसी कपमा मनाङ जित विहिन हुदै प्रतियोगिताको अन्त्य गरेको थियो ।

तर स्रोतका अनुसार एएफसीले मनाङ सहित तीन क्लबको अडिट रिपोर्ट माग गरेको थियो ।

सो जाँचको क्रममा तीन क्लबलाई न्युनतम शर्त समेत पुरा नगरि क्लब लाईसेन्स सिफारिस गरेको भेटिएपछि एएफसीले एन्फालाई कारबाही गर्ने निष्कर्षमा पुगेको हो ।

क्लब लाईसेन्सका लागि आवश्यक शर्त समेत पुरा नगरेका क्लबलाई लाईसेन्स वितरण गरेपछि एएफसीले एन्फालाई १० हजार आर्थिक जरिवाना गरेको हो ।

एएफसीले सोही गल्ती पुन दोहरिए दुई वर्षको प्रतिबन्ध सहित ३५ हजार डलर भन्दा बढी जरिवाना गर्ने चेतावनी एन्फालाई दिएको छ ।

• नेपाल ताराबाट