काठमाडौँ,बैशाख १७ बुधबार २०८१ । सरकार र  आन्दोलनरत नेपाल शिक्षक महासंघबीच नौ बुँदे सहमति भएको छ । बुधबार सरकार र शिक्षक महासंघका प्रतिनिधि बिच ९ बुंदे सहमती पछि काठमाण्डौंमा जारी शिक्षक आन्दोलन स्थगित गरिएको महासंघले  जनाएको छ ।  सरकार र शिक्षक महासंघको सहमतिलाई मन्त्रिपरिषद्‌को बुधबारको बैठकले अनुमोदनसमेत गरिसकेको छ ।

मन्त्रिपरिषद‍्ले शिक्षक, विद्यालय कर्मचारीलाई निजामति अस्पतालमा सहुलियतमा उपचारको व्यवस्था मिलाउने, राहतलगायत अस्थायी शिक्षकलाई बिरामी बिदा सञ्चित गर्ने, सामाजिक सुरक्षा कोषमा आबद्ध गर्ने, ग्रेड समायोजन गर्ने, बालविकास शिक्षकलाई न्यूनतम पारिश्रमिक उपलब्ध गराउने निर्णय गरेको छ ।

सरकारले जारी अधिवेशनबाटै शिक्षा ऐन पारित गर्ने प्रतिबद्धता व्यक्त गरेको छ । बुधबार शिक्षकसँगको वार्तामा सरकारले यस्तो प्रतिबद्धता व्यक्त गरेको हो ।

नेपाल शिक्षक महासङ्घ सँग भएका सहमतिसमझदारीलाई ध्यानमा राख्दै उक्त विधेयकलाई चालू अधिवेशनको अषाढ १५ गतेभित्र प्रतिनिधिसभाबाट पारित गराउन आआफ्नो तहबाट सम्पूर्ण प्रयास गर्न प्रतिबद्ध रहेका बताइएको छ ।