धादिङबेसी । सामान्यतया मेला–महोत्सव भन्नेबित्तिकै हाम्रो मानसपटलमा चर्को स्वरमा गुन्जने संगीत, रोटेपिङको रमाइलो र खानाका परिकारहरूको दृश्य नाच्छ। तर धादिङबेसीको खुल्ला मञ्चमा जारी ‘धादिङ महोत्सव’ले यस पटक यो परम्परागत परिभाषालाई बदलिदिएको छ। कृषि प्रदर्शनी, घरेलु उत्पादन र व्यापारिक स्टलहरूको घन्चमन्चका बीच एउटा यस्तो स्टल छ, जहाँ पुग्नेहरूले केवल शान्तिको अनुभूति मात्र गर्दैनन्, ज्ञानको भारी पनि बोकेर फर्किन्छन्।

धादिङ महोत्सवमा पाँचपोखरी प्रकाशनले राखेको ‘पुस्तक प्रदर्शनी’ यस पटकको महोत्सवको सबैभन्दा बौद्धिक र विशिष्ट आकर्षण बनेको छ। तामझाम र कोलाहलका बीच शान्त र शालीन रूपमा उभिएको यो पुस्तक स्टलले महोत्सवको गरिमालाई अझ उकासेको छ।

आजभोलि एउटा चकलेट किन्न पनि कम्तीमा १० रुपैयाँ चाहिन्छ, तर यो महोत्सवमा तपाईँले मात्र ५ रुपैयाँमा  पुस्तक पाउन सक्नुहुन्छ। प्रदर्शनीमा ५ रुपैयाँदेखि २ हजार रुपैयाँसम्मका विविध विधाका पुस्तकहरूले स्टल भरिभराउ छ। प्रकाशनका प्रतिनिधि योगेश पौडेलका अनुसार महोत्सवको भिडलाई पठन संस्कृतिसँग जोड्न यो विशेष सहुलियत दिइएको हो। यहाँ नयाँ पुस्तक मात्र बेचिन्न, पाठकहरूसँग भएका पुराना पुस्तकहरू समेत खरिद गर्ने व्यवस्था मिलाइएको छ, जुन मोफसलका महोत्सवहरूका लागि एउटा नौलो र प्रशंसनीय अभ्यास हो।

महोत्सवमा प्रदर्शनी हेर्न आउने किसानका लागि उन्नत खेतीपातीका प्राविधिक पुस्तक छन् भने पाका पुस्ताका लागि विभिन्न धार्मिक ग्रन्थहरू राखिएका छन्। युवाहरूका लागि सामाजिक सरोकार, साहित्य, राजनीति र समसामयिक विषयका कृतिहरूले स्टलको रौनक बढाएको छ।

महोत्सवमा आफ्ना बालबालिकालाई खेलौना र खाजा मात्र होइन, एउटा राम्रो पुस्तक किनेर दिने हो भने  यसले विद्यार्थीहरूमा पाठ्यपुस्तक बाहेकका अन्य ज्ञान आर्जन गर्ने रुचि जगाउने निश्चित छ । जुन एउटा सभ्य र सचेत समाज निर्माणका लागि अनिवार्य सर्त हो।

मेला महोत्सव भनेको नयाँ वस्तु र सेवाको प्रवर्द्धन गर्ने थलो हो। जसरी हस्तकलाका सामग्रीको प्रदर्शनी गरिन्छ, त्यसरी नै पुस्तकको प्रदर्शनी गर्नु भनेको ‘पठन संस्कृति’ को प्रवर्द्धन गर्नु हो।

खुल्ला मञ्चमा माघ २५ गतेसम्म चल्ने यस महोत्सवमा एकातिर नाचगानको घन्का छ भने अर्कोतिर पुस्तकका पानाहरू पल्टाउँदै गरेका पाठकहरूको गम्भीर अनुहार देख्न सकिन्छ। खानपान र रमाइलोमा मात्र केन्द्रित हुने महोत्सवहरूका लागि धादिङको यो पुस्तक प्रदर्शनीले एउटा ठुलो सन्देश दिएको छ।

महोत्सव आयोजकले नाचगान र खानपानका स्टलसँगै पुस्तकलाई स्थान दिनुले धादिङको चेतना स्तर उच्च रहेको पुष्टि गर्छ। व्यापारिक नाफा-घाटाको हिसाब एकातिर होला, तर एउटा महोत्सवले समाजमा पठन संस्कृतिको बीउ रोप्न सक्यो भने त्यो नै महोत्सवको सबैभन्दा ठूलो सफलता हो। त्यसैले, महोत्सवमा रमाउन जाँदै गर्दा  एउटा राम्रो पुस्तकको सुगन्ध पनि घर लिएर जानु बुद्धिमानी हुनेछ। किनकि, खानपानले एक दिनको भोक मेटाउँछ, तर ज्ञानले जीवनभर उज्यालो दिन्छ।