काठमाडौँ । अविरल वर्षाका कारण पहिरोको उच्च जोखिम बढेपछि हिजो साँझदेखि ठप्प पारिएको त्रिभुवन राजपथ अन्तर्गत नागढुङ्गा सडक खण्डमा सवारी साधनको आवतजावत पुनः सुचारु भएको छ। नागढुङ्गा नजिकै पहिरो जाने र ढुङ्गा खस्ने सम्भावना बढेपछि प्रहरीले हिजो साँझदेखि काठमाडौँ उपत्यका प्रवेश गर्ने र बाहिरिने दुवैतर्फका सवारी साधनहरूलाई पूर्ण रूपमा रोकेको थियो। रातभर ठप्प रहेको सडक खण्डमा अहिले सुरक्षाको अवस्था मुल्याङ्कन गरी सवारी साधनहरूलाई आलोपालो गरी आ–आफ्नो गन्तव्यतर्फ जान दिइएको नेपाल प्रहरीले जनाएको छ ।

यसअघि लगातारको वर्षाले गर्दा सडकमा बाढी, पहिरो तथा ढुङ्गा खस्ने क्रम बढेपछि सम्भावित मानवीय र भौतिक क्षतिलाई रोक्न प्रहरीले नागढुङ्गा नाकासहित फर्पिङ–दक्षिणकाली सडक खण्डमा समेत सवारी आवागमनमा रोक लगाएको थियो। हिजो साँझदेखि सडक बन्द हुँदा मुख्य राजमार्गमा सयौँको सङ्ख्यामा यात्रुवाहक बस तथा मालवाहक सवारी साधनहरू बीच बाटोमै अलपत्र परेका थिए । आज बिहानबाट सडक केही सुरक्षित देखिएपछि रोकिएका सवारी साधनहरूलाई प्राथमिकताका आधारमा बिस्तारै गन्तव्यतर्फ पठाइएको छ, जसका कारण राजमार्गमा लागेको लामो जाम बिस्तारै कम हुन थालेको छ ।

प्रहरीले सडक खुला गरेर सवारी साधनहरूलाई आवतजावत गर्न दिएको भए तापनि मनसुन सक्रिय रहेकाले यस सडक खण्डमा पहिरोको जोखिम पूर्ण रूपमा टरिनसकेको स्पष्ट पारेको छ । जल तथा मौसम विज्ञान विभागले देशका विभिन्न भूभागमा अझै भारी वर्षाको सम्भावना रहेको बताएकाले यात्रा गर्दा विशेष सावधानी अपनाउन अनुरोध गरिएको छ। प्रहरी प्रशासनले यस सडक खण्ड हुँदै यात्रा गर्ने तयारीमा रहेका सम्पूर्ण चालक तथा यात्रीहरूलाई सडकको ताजा अवस्था बुझेर मात्र यात्रा तय गर्न र राजमार्गमा खटिएका सुरक्षाकर्मीको निर्देशन पूर्ण रूपमा पालना गर्न आग्रह गरेको छ।

• सांकेतिक तस्बिर (एआईबाट)