श्रम तथा रोजगार मन्त्रालयले आइतबार सार्वजनिक गरेको ‘वैदेशिक रोजगारीका लागि श्रम आप्रवास’मा नेपालको स्थिति २०७१-७२ विषयक प्रतिवेदनका अनुसार उक्त अवधिमा सबैभन्दा बढी मलेसियामा मृत्यु भएको छ ।
श्रम तथा रोजगार मन्त्री दीपक बोहराले सबैभन्दा बढी मलेसियामा एक हजार ५ सय ६२, साउदी अरबमा एक हजार १सय ६२, कतारमा ९ सय ३२, दुबईमा ३ सय २६ र कुवेतमा १ सय २९ जनाको मृत्यु भएको छ । श्रम तथा रोजगार मन्त्रालयले २०६५÷६६ देखि २०७१÷७२ सम्म सात वर्षको अवधिमा नेपालीको वैदेशिक रोजगारीको अवस्थाबारे केन्द्रित रहेर प्रतिवेदन तयार पारेको हो ।
यो अवधिमा २७ लाख २३ हजार ५ सय ८७ जना वैदेशिक रोजगारीका लागि श्रम स्वीकृति लिएकोे र तीमध्ये ९५प्रतिशत पुरुष र बाँकी महिला रहेको उल्लेख छ । उक्त अवधिमा नेपाली विदेशिएका शीर्ष गन्तव्य मुलुकमा क्रमशः मलेसिया ३३ दशमलव ३४ प्रतिशत, कतार १९ प्रतिशत, साउदीअरब १८ दशमलव ९३ प्रतिशत, संयुक्त अरब इमिरेट्स (दुबई) नौ दशमलव ८२ प्रतिशत कुवेत दुई दशमलव ४६ प्रतिशत छ ।
महिला कामदार गएका शीर्ष गन्तव्य मुलुकमा क्रमशः दुबई १९ दशमलव ८८ प्रतिशत, मलेसिया १७ दशमलव ९८ प्रतिशत, कुवेत १३ दशमलव ३६, कतार चार दशमलव ७४ प्रतिशत र लेबनान तीन दशमलव १९ प्रतिशत छ ।
कामदार विदेशिएका जिल्लामा सबैभन्दा बढी क्रमशः धनुषा, महोत्तरी, झापा, मोरङ, सिन्धुपाल्चोक, मकवानपुर काभ्रेपलाञ्चोक छन् । म्यानपावरमार्फत ७९ दशमलव नौ प्रतिशत र व्यक्तिगत रुपमा २० प्रतिशत छ ।
मन्त्री बोहराले अवैधानिक ढंगबाट जाने कामदारलाई रोक्ने र वैधानिक माध्यमबाट विप्रेषण भित्र्याउनसके यो क्षेत्रका धेरै समस्या समाधान भन्दै प्रतिवेदनले वैदेशिक रोजगारीको अवस्थाबारे स्पष्ट चित्र ल्याउने काम गरेको बताए ।
सात वर्षको अवधिमा वैदेशिक रोजगारीका क्रममा ४ हजार ३ सय २२ जनाको मृत्यु भएको छ । यस हिसाबले विदेशमा दैनिक लगभग २ जना नेपालीको मृत्यु हुने गरेको छ ।
