काठमाडौँ । नेपालसहित विश्वभरका क्रिश्चियन धर्मावलम्बीहरूले आज येशु ख्रिष्टको जन्मदिनको सम्झनामा ‘क्रिसमस डे’ पर्व हर्षोल्लासका साथ मनाइरहेका छन्। हरेक वर्ष डिसेम्बर २५ तारिखका दिन मनाइने क्रिसमस ख्रीष्टियन धर्मको सबैभन्दा महत्वपूर्ण पर्वमध्ये एक मानिन्छ।

दुई हजार वर्षअघि जेरुसेलम नजिकैको बेथलेहममा कन्या मारियमको कोखबाट येशु ख्रिष्टको जन्म भएको धार्मिक विश्वास छ। येशु ख्रिष्ट, जसलाई जिसस क्राइस्ट पनि भनिन्छ, मानवता, प्रेम, करुणा, क्षमा र समानताको सन्देशवाहकका रूपमा विश्वभर चिनिन्छन्। उनले मानव समुदायका लागि पुर्‍याएको योगदानको सम्मानस्वरूप इस्वी संवत् चलाइएको विश्वास गरिन्छ।

क्रिसमस डे का अवसरमा नेपाल सरकारले आज सार्वजनिक बिदा दिएको छ। देशभरका चर्चहरूमा विशेष प्रार्थना सभा, भजन–कीर्तन, प्रवचन तथा सांस्कृतिक कार्यक्रम आयोजना गरी येशु ख्रिष्टका शिक्षा र उपदेशको स्मरण गरिएको छ। यस अवसरमा प्रेम, शान्ति, आपसी सद्भाव र भाइचाराको सन्देश फैलाउने उद्देश्य राखिएको छ।

क्रिसमसको दिन शुभकामना आदानप्रदान, उपहार दिने–लिने, पारिवारिक जमघट तथा सामाजिक सेवा गर्ने परम्परा छ। बालबालिकामा सान्ता क्लजको प्रतीकात्मक भूमिकाले उत्साह थपेको देखिन्छ। धेरै स्थानमा गरिब, असहाय र वृद्धवृद्धालाई सहयोग गर्ने कार्यक्रमसमेत आयोजना गरिएको छ।

क्रिसमसको अवसरमा काठमाडौँ, ललितपुर, भक्तपुर र पोखरालगायतका सहरमा विशेष रौनक देखिएको छ। बजार क्षेत्र, ठूला व्यापारिक केन्द्र, होटल तथा रेस्टुरेन्टहरू क्रिसमस ट्री, रंगीन बत्ती र सजावटले सिँगारिएका छन्। यसले सहरको वातावरणलाई अझै चहलपहलयुक्त बनाएको छ।

यसैबीच, क्रिसमस र नयाँ वर्षलाई लक्षित गर्दै सुरक्षा व्यवस्था कडा पारिएको छ। चर्च, सार्वजनिक स्थल र भीडभाड हुने स्थानमा प्रहरी परिचालन बढाइएको छ। शान्तिपूर्ण रूपमा पर्व मनाउन सर्वसाधारणलाई सुरक्षा निकायले सहयोग गर्न आग्रह गरेको छ।

क्रिसमसको चहलपहलले पर्यटन र व्यापारिक गतिविधिमा समेत सकारात्मक प्रभाव पारेको देखिएको छ। आन्तरिक तथा विदेशी पर्यटकको आवागमन बढेको छ भने होटल, यातायात र खुद्रा व्यापारमा कारोबार वृद्धि भएको व्यवसायीहरूले बताएका छन्।

धार्मिक विविधता रहेको नेपालमा क्रिसमस पर्वले आपसी सम्मान, धार्मिक सहिष्णुता र सामाजिक एकताको सन्देश दिएको सरोकारवालाहरूको भनाइ छ। प्रेम र मानवताको सन्देश बोकेको यस पर्वले समाजमा शान्ति र सद्भाव फैलाउने विश्वास लिइएको छ।