काठमाडौँ । जल तथा मौसम विज्ञान विभागले देशभर पश्चिमी वायुको आंशिक प्रभाव रहेको जानकारी दिएको छ। विभागका अनुसार हाल तराईका धेरै स्थानहरूमा हुस्सु लागेको छ भने गण्डकी र कर्णाली प्रदेशमा आंशिक बदली तथा बाँकी पहाडी र हिमाली भू–भागमा मौसम मुख्यतया सफा रहेको छ।

विभागले तराई भू–भागमा देखिएको हुस्सु/कुहिरोका कारण दैनिक जनजीवन, स्वास्थ्य, सडक तथा हवाई यातायातमा प्रभाव पर्न सक्ने चेतावनी दिएको छ।

त्यस्तै, आज दिउँसो र राति तराईका अधिकांश स्थानमा हुस्सु/कुहिरो कायम रहने पूर्वानुमान गरिएको छ। देशका पहाडी तथा हिमाली भू–भागमा आंशिक बदली रहनेछ भने कोशी र गण्डकी प्रदेशका उच्च पहाडी तथा हिमाली भू–भागका एक–दुई स्थानमा हल्का वर्षा वा हिमपातको सम्भावना रहेको विभागले जनाएको छ।