काठमाडौँ, २४ माघ: नेपाल पुस्तक तथा स्टेशनरी व्यवसायी महासंघको आठौँ राष्ट्रिय महाधिवेशनले धादिङका नारायण कुमार श्रेष्ठको अध्यक्षतामा नयाँ केन्द्रीय कार्यसमिति चयन गरेको छ। काठमाडौँमा सम्पन्न महाधिवेशनले आगामी कार्यकालका लागि श्रेष्ठको नेतृत्वमा नयाँ टिम चयन गरेको हो।

  महाधिवेशनले देशभरका पुस्तक तथा स्टेशनरी व्यवसायीहरूको हकहित संरक्षण गर्दै व्यवसायलाई थप मर्यादित र व्यावसायिक बनाउने संकल्प पारित गरेको छ।

नवनिर्वाचित अध्यक्ष श्रेष्ठले आफ्नो कार्यकालमा व्यवसायीहरूले भोग्दै आएका नीतिगत समस्याहरू समाधान गर्न र पुस्तक व्यवसायलाई प्रविधिमैत्री बनाउन विशेष पहल गर्ने प्रतिबद्धता व्यक्त गर्नुभएको छ। उहाँले राज्यको शिक्षा नीति र पाठ्यपुस्तक वितरण प्रणालीमा रहेका चुनौतीहरूलाई सम्बोधन गर्न महासंघले सरकारसँग प्रभावकारी रूपमा समन्वय गर्ने समेत बताउनुभयो।

महाधिवेशनमा देशभरका ७७ वटै जिल्लाका प्रतिनिधिहरूको सहभागिता रहेको थियो। नयाँ नेतृत्वले संस्थागत विकास र सदस्यहरूको क्षमता अभिवृद्धिका लागि विभिन्न रचनात्मक कार्यक्रमहरू ल्याउने योजना बनाएको छ।