काठमाडौँ, ३ फागुन। नेपालको मौसमी प्रणालीमा हाल पश्चिमी वायुको आंशिक प्रभाव देखिएकाले देशका विभिन्न भागको मौसममा फेरबदल आएको छ।

जल तथा मौसम पूर्वानुमान महाशाखाले उपलब्ध गराएको पछिल्लो विवरण अनुसार कोशी, बागमती र गण्डकी प्रदेशका उच्च पहाडी तथा हिमाली क्षेत्रमा आंशिक बदलीको अवस्था रहेको छ। आज दिउँसो कोशी, बागमती र गण्डकी प्रदेशका पहाडी तथा उच्च हिमाली भेगका केही स्थानहरूमा हल्का वर्षासँगै हिमपात हुने सम्भावना देखिएको छ भने कर्णाली र अन्य प्रदेशका उच्च पहाडी भागमा पनि एक-दुई स्थानमा छिटफुट हिमपात हुन सक्ने अनुमान गरिएको छ।

तराईका जिल्लाहरूमा भने आज बिहानदेखि मध्याह्नसम्म कुहिरो र हुस्सु लाग्ने भएकाले जनजीवनमा केही प्रभाव पर्न सक्ने देखिए पनि दिउँसोबाट मौसम बिस्तारै सफा हुँदै जानेछ। रातिको समयमा पनि कोशी र गण्डकी प्रदेशका उच्च हिमाली भूभागका थोरै स्थानमा हल्का हिमपातको सम्भावना कायमै रहने महाशाखाको भनाइ छ। बाँकी क्षेत्रमा भने मौसम मुख्यतया सफा रहने र तराईमा रातिको समयमा हल्का तुँवालो लाग्न सक्ने प्रक्षेपण गरिएको छ।