धादिङ । धादिङ जिल्लामा सम्पन्न प्रतिनिधिसभा सदस्य निर्वाचनमा कुल ५० दशमलव २९ प्रतिशत मत खसेको छ। जिल्ला निर्वाचन कार्यालयको प्रारम्भिक विवरण अनुसार जिल्लामा रहेका २ लाख ७५ हजार २८० मतदातामध्ये १ लाख ३८ हजार ४४७ जनाले मतदान गरेका छन्।

जिल्लाभर रहेका ११४ मतदानस्थलबाट मतपेटिका सङ्कलन गरी सम्बन्धित निर्वाचन अधिकृतको कार्यालयमा ल्याउने कार्य सुरु गरिएको छ।

निर्वाचन क्षेत्र नम्बर १ का मतपेटिका गल्छी गाउँपालिका–महेशदोभानस्थित निर्वाचन अधिकृतको कार्यालयमा सङ्कलन गरिनेछ भने निर्वाचन क्षेत्र नम्बर २ का मतपेटिका सदरमुकाम धादिङबेसीस्थित मुख्य निर्वाचन अधिकृतको कार्यालयमा ल्याइने जिल्ला निर्वाचन कार्यालय धादिङका प्रमुख शिवबहादुर गुरुङले जानकारी दिनुभयो।

गुरुङका अनुसार क्षेत्र नम्बर १ का सबै मतपेटिका आज राति १२ बजेसम्म निर्वाचन अधिकृतको कार्यालयमा पुगिसक्ने अनुमान गरिएको छ।

त्यस्तै क्षेत्र नम्बर २ अन्तर्गत पर्ने रुवीभ्याली, खनियाबास र गंगाजमुना गाउँपालिकाका मतदान केन्द्रहरूबाट मतपेटिका भौगोलिक विकटताका कारण शुक्रबार दिउँसो मात्र सदरमुकाम आइपुग्ने जनाइएको छ।

सदरमुकाम आसपासका पालिकाहरूबाट भने आजै मतपेटिका मतगणनास्थलमा ल्याउने तयारी भइरहेको छ।