काठमाडौँ । प्रधानमन्त्री तथा मन्त्रिपरिषद् कार्यालयले सार्वजनिक गरेको मन्त्रीहरूको सम्पत्ति विवरणले नेपाली राजनीति र सत्ता सञ्चालकहरूको आर्थिक अवस्थाको एउटा रोचक पक्ष उजागर गरेको छ। विशेषगरी प्रधानमन्त्री बालेन्द्र शाहदेखि मन्त्रिपरिषद्का अन्य सदस्यहरूको परिवारका नाममा रहेको सुनचाँदी र बहुमूल्य गहनाको परिमाण हेर्दा नेपाली समाजमा अझै पनि धातुजन्य सम्पत्तिलाई सुरक्षा र प्रतिष्ठाको मुख्य आधार मान्ने परम्परा कायमै रहेको देखिन्छ। यस प्रतिवेदन अनुसार प्रधानमन्त्री बालेन्द्र शाहकी पत्नी सबिनाको नाममा मात्रै १९० तोला सुन रहेको पाइएको छ, जुन मन्त्रिमण्डलका अन्य सदस्यहरूको तुलनामा निकै बढी हो। त्यस्तै मन्त्री गौरी कुमारी यादवसँग १८० तोला सुन र २ किलो चाँदी रहेको तथ्याङ्कले उनी पनि आर्थिक रूपमा निकै सबल रहेको पुष्टि गर्दछ।

मन्त्रिपरिषद्का अन्य प्रभावशाली सदस्यहरूमध्ये सुधन गुरुङसँग ८९ तोला सुन र ६ किलो चाँदी रहेको छ भने रामजी यादवसँग ८० तोला सुन र १५० तोला चाँदी रहेको विवरणमा उल्लेख छ। युवा र प्राविधिक पृष्ठभूमिका भनिएका मन्त्रीहरू डा. स्वर्णिम वाग्ले, शिशिर खनाल, विराजभक्त श्रेष्ठ र सोविता गौतमको हकमा पनि सुनको परिमाण उल्लेख्य नै देखिन्छ। डा. वाग्लेसँग ४५ तोला र सुनिल लम्सालसँग ३० तोला सुन रहेको छ भने सस्मित पोखरेल र प्रतिभा रावल दुवैसँग जनही २५ तोला सुन रहेको देखिन्छ। यसैगरी मन्त्री निशा मेहतासँग ३० तोला, सीता बादीसँग १८ तोला, खडकराज पौडेलसँग ११ तोला, डा. बिक्रम तिमिल्सिनासँँग ६ तोला र गीता चौधरीसँग ५ तोला सुन रहेको सार्वजनिक विवरणले देखाउँछ।

समग्र मन्त्रिपरिषद्को यो सुनचाँदीको विवरणलाई एकीकृत रूपमा विश्लेषण गर्दा यस टोलीको कूल सुनको भण्डार झन्डै ६ सय ९५ तोला पुगेको देखिन्छ। चाँदीको हकमा पनि ८ किलो भन्दा बढी र थप ५ सय ६४ तोला चाँदी मन्त्रीहरूको परिवारसँग सुरक्षित रहेको पाइन्छ।

मन्त्री सोविता गौतमको नाममा १ तोला हीरा समेत रहेको विवरणमा उल्लेख छ। राज्यका उच्च पदस्थ व्यक्तित्वहरूले आफ्नो र परिवारको सम्पत्ति पारदर्शी रूपमा सार्वजनिक गर्नु लोकतान्त्रिक अभ्यासका लागि सकारात्मक पक्ष हो। यसले सार्वजनिक पदमा रहेका व्यक्तिहरूको जीवनस्तर र उनीहरूको आर्थिक पृष्ठभूमिलाई जनताले नजिकबाट बुझ्ने अवसर प्रदान गरेको छ। यस्तो ठूलो परिमाणमा रहेको सुनचाँदी र बहुमूल्य धातुले मन्त्रीहरूको पारिवारिक सम्पन्नतालाई मात्र नभई नेपाली राजनीतिमा आर्थिक रूपमा सबल वर्गको उपस्थितिलाई समेत संकेत गर्दछ।