काठमाडौँ । नेपाल प्रहरी ले अदालतबाट दोषी ठहर भई फरार रहेका तथा विभिन्न मुद्दामा लामो समयदेखि लुकिछिपी बस्दै आएका प्रतिवादीहरूविरुद्ध सञ्चालन गरेको विशेष अभियानमा उल्लेखनीय सफलता हासिल गरेको छ। प्रहरी प्रधान कार्यालयका अनुसार २०८३ साल वैशाख महिनामा मात्रै देशभरबाट २ हजार ३ सय १९ जना फरार प्रतिवादी पक्राउ परेका हुन्।

प्रहरीले अदालतको फैसला कार्यान्वयनलाई प्रभावकारी बनाउन देशव्यापी रूपमा “फरार प्रतिवादी खोज तथा पक्राउ अभियान” सञ्चालन गर्दै आएको छ। सोही अभियान अन्तर्गत विभिन्न प्रदेश प्रहरी कार्यालय, जिल्ला प्रहरी कार्यालय तथा विशेष अनुसन्धान इकाइहरूको समन्वयमा व्यापक खोजतलास गरिएको थियो।

तथ्यांकअनुसार सबैभन्दा बढी फरार प्रतिवादी मधेश प्रदेश बाट पक्राउ परेका छन्। मधेश प्रदेश प्रहरी कार्यालय अन्तर्गतका इकाइहरूले मात्रै ७३० जना प्रतिवादी नियन्त्रणमा लिएका छन्। त्यसपछि काठमाडौँ उपत्यका प्रहरी कार्यालयबाट ३६६ जना, लुम्बिनी प्रदेश बाट ३३० जना, कोशी प्रदेश बाट ३२६ जना पक्राउ परेका छन्।

यस्तै गण्डकी प्रदेश बाट २०४ जना, बागमती प्रदेश बाट १९९ जना, सुदूरपश्चिम प्रदेश बाट ८४ जना तथा कर्णाली प्रदेश बाट ६८ जना फरार प्रतिवादी पक्राउ गरिएको प्रहरीले जनाएको छ।

यसैबीच केन्द्रीय अनुसन्धान ब्यूरो ले आर्थिक अपराध, ठगी, संगठित अपराध लगायतका गम्भीर प्रकृतिका मुद्दामा संलग्न १२ जना हाई-प्रोफाइल फरार प्रतिवादीलाई समेत पक्राउ गरी कानुनी दायरामा ल्याएको छ।

प्रहरीका अनुसार पक्राउ परेका प्रतिवादीहरूमाथि अदालतबाट सुनाइएको कुल ८ सय २५ वर्ष २ महिना २५ दिन कैद सजाय कार्यान्वयन गरिएको छ। उनीहरूलाई सम्बन्धित कारागार चलान गरिएको छ। साथै उनीहरूबाट २१ करोड ५३ लाख ६९ हजार १ सय १० रुपैयाँ जरिवाना असुल गरी राजस्व खातामा दाखिला गरिएको पनि प्रहरीले जनाएको छ।

नेपाल प्रहरीको यो अभियानले अदालतका फैसला कार्यान्वयनलाई प्रभावकारी बनाउनुका साथै अपराध नियन्त्रण, दण्डहीनताको अन्त्य तथा विधिको शासन स्थापित गर्न महत्वपूर्ण योगदान पुगेको विश्लेषण गरिएको छ। पछिल्लो समय अदालतको फैसला कार्यान्वयनमा प्रहरीको सक्रियता बढेसँगै वर्षौंदेखि फरार रहेका प्रतिवादीहरू समेत पक्राउ पर्न थालेका छन्।