धादिङ । धादिङको रुवीभ्याली गाउँपालिका–४ स्थित मुक्रापदेबी माध्यमिक विद्यालयले स्थानीय संस्कृतिको जगेर्ना गर्ने उद्देश्यले निकै उदाहरणीय अभियानको सुरुवात गरेको छ। विद्यालयले अबदेखि प्रत्येक हप्ताको आइतबारलाई ‘सांस्कृतिक दिन’ को रूपमा मनाउँदै तामाङ संस्कृति र परम्पराबारे पठनपाठन सुरु गरेको छ।

यो अभियानको सुरुवातसँगै विद्यार्थीहरू परम्परागत तामाङ पोशाकमा विद्यालय आउन थालेका छन्। आफ्नै जातीय र सांस्कृतिक पहिचान झल्किने पोशाकमा विद्यालय आउन पाउँदा विद्यार्थीहरूमा उत्साह र खुसी प्रष्ट देखिन्थ्यो।

अभियानको पहिलो आइतबार रुवीभ्याली गाउँपालिका–४ का वडाअध्यक्ष प्रशान्त तामाङले विद्यार्थीहरूलाई तामाङ भाषा, संस्कार, संस्कृति र परम्पराको महत्वबारे सहजीकरण गरेका थिए। वडाअध्यक्ष तामाङले विद्यालयको यो पहलले नयाँ पुस्तामा आफ्नो मौलिक पहिचानको जगेर्ना गर्न महत्वपूर्ण भूमिका खेल्ने विश्वास व्यक्त गर्नु भएको थियो ।

विद्यालयका प्रधानाध्यापक तिर्थराज सुवेदीका अनुसार, आधुनिकताको प्रभावमा हराउँदै गएको स्थानीय संस्कृति, भाषा र परम्परालाई विद्यार्थीमाझ हस्तान्तरण गर्न विद्यालयले यस्तो अभियान थालेको हो। “हाम्रो संस्कृति नै हाम्रो असली पहिचान हो। पाठ्यक्रमका ज्ञानसँगै आफ्नो संस्कार र संस्कृतिलाई जोड्न सके मात्र भोलिको पुस्ताले आफ्ना जराहरूलाई बिर्सने छैन,” प्रधानाध्यापक सुवेदीले धादिङ न्यूजसँग भन्नु भयो ।

स्थानीय समुदाय र अभिभावकहरूले समेत विद्यालयको यस कदमलाई स्वागत गर्दै यसले विद्यार्थीमा आफ्नो संस्कृतिप्रति गौरव गर्ने भावना विकास गर्ने प्रतिक्रिया दिएका छन्। रुवीभ्याली जस्तो दुर्गम र सांस्कृतिक रूपमा धनी क्षेत्रमा विद्यालयले सुरु गरेको यो ‘सांस्कृतिक पठनपाठन’ अन्य विद्यालयहरूका लागि समेत सिको गर्ने लायकको नमुना बनेको छ।