धादिङ,- धादिङको नीलकण्ठ नगरपालिका–३, रिजाल गाउँ निवासी १३ वर्षीय अप्सन रिजाल यतिबेला क्यान्सरजस्तो जटिल रोगसँग जीवन–मरणको संघर्ष गरिरहेका छन्। खेल्ने, पढ्ने, साथीहरूसँग रमाउने र उज्ज्वल भविष्यको सपना बुन्ने उमेरमा उनी अहिले अस्पतालको शय्यामा उपचाररत छन्।

परिवारका अनुसार करिब ६ महिनाअघि अप्सनको हातमा सामान्य सुम्लो देखिएको थियो। सुरुमा सामान्य समस्या ठानिए पनि समयसँगै सुन्निने र दुखाइ बढ्दै गएपछि परिवारले विभिन्न अस्पतालमा स्वास्थ्य परीक्षण गरायो। अन्ततः विस्तृत परीक्षणपछि चिकित्सकहरूले उनलाई क्यान्सर भएको पुष्टि गरेका थिए।

हाल अप्सनको उपचार चितवनस्थित भरतपुर क्यान्सर अस्पतालमा भइरहेको छ। उपचारमा संलग्न चिकित्सकहरूले समयमै आवश्यक उपचारलाई निरन्तरता दिन सके अप्सन पूर्ण रूपमा निको हुने सम्भावना रहेको बताएका छन्। तर उपचार प्रक्रिया लामो र खर्चिलो भएकाले परिवार गम्भीर आर्थिक संकटमा परेको छ।

चिकित्सकका अनुसार शल्यक्रिया, आवश्यक औषधि, नियमित परीक्षण तथा अन्य उपचार प्रक्रियाका लागि कम्तीमा ७ लाख रुपैयाँभन्दा बढी खर्च लाग्ने अनुमान गरिएको छ। प्रारम्भिक उपचारमै परिवारको सबै बचत सकिएको छ भने अब थप उपचारलाई निरन्तरता दिन आर्थिक अभाव मुख्य चुनौती बनेको छ।

अप्सनका बुबा एकादत्त रिजाल (अर्जुन)  र आमा लक्ष्मी रिजालको आर्थिक अवस्था कमजोर भएकाले उनीहरू आफ्नै प्रयासबाट उपचार खर्च जुटाउन असमर्थ भएका छन्। छोराको जीवन बचाउन उनीहरूले सहयोगी मनहरूसँग भावुक अपिल गरेका छन्।

परिवारले देश तथा विदेशमा रहेका सबै नेपाली, विभिन्न संघसंस्था, समाजसेवी, व्यवसायी तथा सहयोगी मनहरूलाई आफ्नो क्षमता अनुसार आर्थिक सहयोग गरिदिन आग्रह गरेको छ। परिवारका अनुसार सानो–सानो सहयोगले पनि अप्सनको उपचारलाई निरन्तरता दिन ठूलो टेवा पुग्ने विश्वास गरिएको छ।

सहयोग गर्न नसक्नेहरूले पनि यो अपिललाई सामाजिक सञ्जालमार्फत धेरैभन्दा धेरै शेयर गरिदिन परिवारले अनुरोध गरेको छ। एउटा शेयरले पनि सहयोग गर्न इच्छुक व्यक्तिसम्म यो सन्देश पुग्न सक्ने र त्यसले एउटा बालकको जीवन बचाउन महत्वपूर्ण भूमिका खेल्न सक्ने अपेक्षा गरिएको छ।

सहयोगका लागि बैंक खाता विवरण

बैंक: सानिमा बैंक लिमिटेड, धादिङबेसी शाखा
खातावालाको नाम: एकादत्त रिजाल
खाता नम्बर: 004011060007705

अप्सनको उपचार सफल बनाउन र उनको जीवन बचाउने अभियानमा सबैले आ–आफ्नो ठाउँबाट साथ दिऔँ। मानवता नै सबैभन्दा ठूलो धर्म हो। तपाईंको सानो सहयोगले पनि एउटा बालकलाई नयाँ जीवन दिने आशा जगाउन सक्छ।