काठमाडौँ । राष्ट्रिय परीक्षा बोर्डले माध्यमिक शिक्षा परीक्षा (एसईई) २०८२ को ग्रेडवृद्धि अर्थात् पूरक परीक्षाको नतिजा सार्वजनिक गरेको छ। नियमित परीक्षामा ‘नन-ग्रेडिङ’  मा परेका विद्यार्थीहरूका लागि बोर्डले यही असार १ गतेदेखि ९ गतेसम्म ग्रेडवृद्धि परीक्षा सञ्चालन गरेको थियो।  बोर्डले मंगलवार नतिजा सार्वजनिक गरेको हो।

बोर्डका अनुसार नियमित परीक्षामा एनजी आएका कुल १ लाख ४६ हजार ५०७ परीक्षार्थीमध्ये १ लाख २९ हजार ११४ जना मात्र ग्रेडवृद्धि परीक्षामा सहभागी भएका थिए। परीक्षामा सामेल भएकामध्ये ८३ हजार ५२३ जना उत्तीर्ण (ग्रेड प्राप्त गर्न सफल) भएका छन्। यो कुल सहभागी संख्याको ६४.६९ प्रतिशत हो। उत्तीर्ण भएका यी विद्यार्थीहरू अब कक्षा ११ मा भर्ना हुन योग्य भएका छन्।

यस पटकको ग्रेडवृद्धि परीक्षामा उत्तीर्ण भएका विद्यार्थीहरूको जीपीए विवरण निम्न अनुसार रहेको छ:

नोट: ०.८० देखि १.६० जीपीए प्राप्त गर्ने विद्यार्थी संख्या शून्य रहेको छ।

परीक्षालाई मर्यादित बनाउन बोर्डले चालेको कदम अन्तर्गत परीक्षा मर्यादा विपरीत कार्य गरेको आरोपमा केन्द्राध्यक्षहरूबाट सिफारिस भई आएका ७ जना परीक्षार्थीको परीक्षा रद्द गरिएको बोर्डले जनाएको छ।

विद्यार्थीहरूले आफ्नो नतिजा लेजर र मार्कसिटसहित हेर्नका लागि राष्ट्रिय परीक्षा बोर्डको आधिकारिक वेबसाइट, नेपाल टेलिकमको आईभीआर (IVR) तथा सर्टकोडमार्फत एसएमएस  र यूएसएसडी सेवा प्रयोग गर्न सक्नेछन्।

सार्वजनिक भएको नतिजामा चित्त नबुझ्ने विद्यार्थीहरूलाई मर्का नपरोस् भनी बोर्डले पुनर्योगको अवसर समेत दिएको छ। नतिजा चित्त नबुझेका विद्यार्थीले बोर्डले तोकेको निश्चित अवधिभित्र भौतिक रूपमा कार्यालय धाउनु नपर्ने गरी अनलाइन माध्यमबाटै आवेदन दिन सक्ने व्यवस्था मिलाइएको छ।

यो नतिजा आएसँगै नियमित परीक्षामा अनुत्तीर्ण भएका ठुलो संख्याका विद्यार्थीहरूको शैक्षिक सत्र बचत भएको छ र उनीहरूले यसै वर्ष कक्षा ११ मा भर्ना भएर आफ्नो उच्च शिक्षाको यात्रा तय गर्न पाउने भएका छन्।