धादिङ, २४ साउन । बिहानको यात्रा सामान्य थियो। गन्तव्य थियो-बेनिघाट रोराङ गाउँपालिका–८ स्थित चैलिङ सामुदायिक होमस्टे। नेपाल बार एसोसिएसन धादिङको साधारण सभामा सहभागी हुन धादिङका १८ जना कानून व्यवसायी ईभी हाइसमा सवार थिए। धादिङबेँसीबाट मलेखु, चरौँदी हुँदै बिधाङ नजिकै पुग्दा केही क्षणमै यात्राको माहोल स्तब्ध बन्यो।

बा प्र ०१–००६६ ख ८६१६ नम्बरको ईभी हाइसका ५० वर्षीय चालक सिद्धलेक गाउँपालिका–३ निवासी मिन नारायण श्रेष्ठले पौने १० बजेतिर अचानक आफूलाई असहज महसुस गरे। अवस्था बिग्रिँदै गएको महसुस गरेपछि उनले एक क्षण पनि ढिला नगरी हाइसमा ब्रेक लगाए र सवारीसाधन रोके।

सायद त्यही एउटा निर्णयले १८ जनाको जीवन जोगायो।

चलिरहेको सवारीसाधनमा अचानक चालकलाई हृदयघात हुँदा ठूलो दुर्घटना हुन सक्थ्यो। तर श्रेष्ठले आफूलाई असहज महसुस गर्नेबित्तिकै तत्काल सवारी रोके। चालक श्रेष्ठको विवेक, सावधानी र जिम्मेवारीबोधकै कारण हाइसमा सवार कानून व्यवसायीहरू सकुशल रहे।

तर, अरूको जीवन जोगाउने त्यो सावधानी अपनाएका श्रेष्ठले भने आफ्नै जीवन जोगाउन सकेनन्।

हाइस रोकेलगत्तै उनको अवस्था गम्भीर देखिएपछि तत्काल नजिकैको स्वास्थ्य केन्द्र लगिएको थियो। त्यहाँबाट थप उपचारका लागि मलेखुस्थित टिचिङ अस्पताल पुर्‍याइएको थियो। तर, अस्पताल पुर्‍याउँदा चिकित्सकले उनलाई मृत घोषणा गरे। घटनाबारे अधिवक्ता रामकृष्ण अधिकारीले जानकारी दिनुभयो।

जुन स्टेरिङले १८ जना कानून व्यवसायीलाई सुरक्षित रूपमा गन्तव्यतर्फ लैजाँदै थियो, त्यही स्टेरिङमै मिननारायण श्रेष्ठको जीवनको यात्रा सधैँका लागि रोकियो।

एकातिर दुर्घटना टरेको राहत, अर्कोतिर चालक गुमाएको पीडा। केही क्षणअघिसम्म यात्रामा सँगै रहेका चालक श्रेष्ठलाई अचानक गुमाउनुपर्दा कानून व्यवसायीहरू स्तब्ध बनेका छन्। उनीहरूको सुरक्षित यात्राका लागि अन्तिम क्षणसम्म जिम्मेवारी निभाएका श्रेष्ठको निधनले यात्रामा सहभागीहरू मात्र होइन, उनको परिवार, आफन्त र शुभेच्छुकहरूलाई समेत गहिरो शोकमा डुबाएको छ।

चालक श्रेष्ठले आफूलाई असहज महसुस गरेको क्षणमा हाइस नरोकेको भए के हुन्थ्यो? चलिरहेको सवारीसाधनमा चालकलाई अचानक हृदयघात भएको अवस्थामा हुन सक्ने सम्भावित दुर्घटनाले अझ ठूलो मानवीय क्षति निम्त्याउन सक्थ्यो। तर, श्रेष्ठको अन्तिम क्षणको सावधानीले १८ जनालाई सुरक्षित राख्यो।

उनले अरूलाई गन्तव्यसम्म पुर्‍याउने आफ्नो जिम्मेवारी पूरा गरे, तर आफू भने गन्तव्यमा पुग्न सकेनन्। यात्रामा सँगै रहेका १८ जनाको जीवन सुरक्षित भयो, तर उनी आफैंको जीवनयात्रा भने त्यही बाटोमा, त्यही सवारीसाधनको स्टेरिङमा आएर टुंगियो।

श्रेष्ठको सावधानीका कारण ठूलो मानवीय क्षति हुन पाएन। तर, १८ जनालाई सुरक्षित राखेर आफू भने सदाका लागि बिदा भएका श्रेष्ठको दुःखद निधनले सबैलाई स्तब्ध बनाएको छ।

नारायण श्रेष्ठको निधनमा नेपाल बार एसोसिएसन धादिङका कानून व्यवसायीहरू तथा शुभेच्छुकहरूले गहिरो दुःख व्यक्त गरेका छन्। उनको निधनले परिवार र आफन्तजनमा अपूरणीय क्षति पुगेको छ भने यात्रामा सहभागी कानून व्यवसायीहरूका लागि पनि यो यात्रा जीवनभर सम्झनामा रहने पीडादायी घटना बनेको छ।

उक्त ईभी हाइसमा सवार कानून व्यवसायीहरूमा टंककुमार श्रेष्ठ, रामचन्द्र भट्ट, रामकृष्ण अधिकारी, खिल गिरी, विश्वराज अधिकारी, गोपी अर्याल, अम्बिका घिमिरे, दिनेश दुवाडी, विनोदमान श्रेष्ठ, पुष्पविक्रम मल्ल, विष्णुकुमार श्रेष्ठ, दीपक सेन, मेघनाथ दुवाडी, कुलमान विक, कृष्णराज अधिकारी, मञ्जु बस्नेत, रविना पौडेल र शोभा श्रेष्ठ रहेका थिए।

नारायण श्रेष्ठले अन्तिम क्षणमा देखाएको त्यो सावधानी १८ जनाका लागि नयाँ जीवन बनेको छ। तर, उनी आफैंको जीवन भने त्यही दिन, त्यही बाटो र त्यही स्टेरिङमै सदाका लागि अस्ताएको छ।

अरूलाई सुरक्षित गन्तव्यसम्म पुर्‍याउने क्रममा आफ्नै गन्तव्य गुमाएका नारायण श्रेष्ठप्रति भावपूर्ण श्रद्धाञ्जली।