धादिङ । धादिङको गजुरी गाउँपालिका-२ चालिसेस्थित  पृथ्वीराजमार्गमा सुख्खा पहिरो खस्दा सडक दुईतर्फी अवरुद्ध भएको छ।

२०८३ भदौ १ गते बिहान करिब ५ः४५ बजे सडकभन्दा माथिबाट अचानक सुख्खा पहिरो खसेपछि सवारीसाधनको आवागमन पूर्ण रूपमा रोकिएको प्रहरीले जनाएको छ। सडक अवरुद्ध हुँदा काठमाडौं भित्रिने तथा बाहिरिने सवारीसाधन बीच बाटोमै रोकिएका छन्।

घटनाको जानकारी प्राप्त हुनासाथ इलाका प्रहरी कार्यालय गजुरीबाट प्रहरी सहायक निरीक्षक रामशरण बस्नेतको कमान्डमा ट्राफिक प्रहरीसहित छ सदस्यीय टोली घटनास्थलमा खटिएको छ। सम्बन्धित निकायसँग समन्वय गरी पहिरो पन्छाएर सडक सञ्चालनमा ल्याउने काम भइरहेको प्रहरीले जनाएको छ।

पहिरो पन्छाउने काम जारी रहेकाले यात्रु तथा सवारीचालकलाई सडकको अवस्था बुझेर मात्र यात्रा गर्न र सुरक्षाकर्मीको निर्देशन पालना गर्न आग्रह गरिएको छ।