काठमाडौँ । पृथ्वी राजमार्गका विभिन्न स्थानमा सडक अवरुद्ध भएपछि प्रभावित बनेको काठमाडौँ उपत्यकाको ग्यास आपूर्ति सहज बनाउन उपत्यकाबाहिरका उद्योगबाट दैनिक ठूलो परिमाणमा ग्यास पठाउन थालिएको छ । उद्योगीका अनुसार पछिल्ला दिनमा दैनिक औसत ३५ हजार सिलिन्डर वैकल्पिक मार्ग हुँदै काठमाडौँ पुर्‍याइँदैछ ।

कृष्णभीरलगायत पृथ्वी राजमार्गका विभिन्न खण्डमा सडक अवरुद्ध हुँदा ग्यासका बुलेट काठमाडौँसम्म पुर्‍याउन समस्या भएपछि चितवन, मकवानपुर, बारा, पर्सालगायतका जिल्लामा रहेका उद्योगबाट सिलिन्डरमै ग्यास भरेर उपत्यका पठाउने व्यवस्था मिलाइएको हो ।

नेपाल एलपी ग्यास उद्योग सङ्घका अध्यक्ष दिवान चन्दका अनुसार बिहीबार २४ हजार, शुक्रबार ३४ हजार र शनिबार करिब ३५ हजार सिलिन्डर काठमाडौँ पठाइएको छ । नेपाल आयल निगमले उपत्यकाबाहिर ग्यास भरेर वैकल्पिक मार्गबाट ल्याउने अनुमति दिएपछि यस्तो व्यवस्था सुरु गरिएको हो ।

काठमाडौँमा खाली भएका सिलिन्डर ट्रकमार्फत उपत्यकाबाहिरका उद्योगमा पुर्‍याउने र त्यहीँ ग्यास भरेर पुनः काठमाडौँ पठाउने गरिएको उद्योगीहरूले बताएका छन् ।

चितवनका विभिन्न उद्योगसँगै नवलपुर, बारा, पर्सा, धनुषा र हेटौँडाका उद्योगबाट समेत ग्यास भरेर उपत्यका पठाउने गरिएको छ । साल्ट ट्रेडिङ कर्पोरेसनले पनि आफ्ना खाली सिलिन्डर निजी ग्यास उद्योगका सहज स्थानमा रहेका प्लान्टसँग सहकार्य गरी भर्ने र वैकल्पिक मार्गबाट काठमाडौँ पुर्‍याउने व्यवस्था गरेको जनाएको छ ।

सामान्य अवस्थामा काठमाडौँ उपत्यकामा दैनिक करिब ४० हजार सिलिन्डर ग्यास खपत हुने गरेको उद्योगीहरूको भनाइ छ । आपूर्ति बढाएर माग धान्ने प्रयास भइरहेको बताइए पनि काठमाडौँ उपत्यका र बनेपामा उपभोक्ताले अझै ग्यासको अभाव कायमै रहेको गुनासो गरेका छन् ।

यसैबीच, वैकल्पिक स्थानमा सिलिन्डर भरेर ल्याउँदा लाग्ने थप ढुवानी खर्चका कारण नेपाल आयल निगमले प्रतिसिलिन्डर १०५ रुपैयाँ ३८ पैसा अतिरिक्त मूल्यमा बिक्री गर्न अनुमति दिएको छ । त्यसअनुसार ग्यासको मूल्य प्रतिसिलिन्डर २ हजार १६५ रुपैयाँ ३८ पैसा पुगेको छ।