धादिङ । पृथ्वी राजमार्ग अन्तर्गत धादिङको थाँक्रे गाउँपालिकास्थित १२ किलो भन्ने स्थानमा सडक माथिबाट पहिरो खस्दा राजमार्ग पूर्ण रूपमा अवरुद्ध भएको छ।

केही बेर अगाडि सडक माथिबाट लेदो र ढुङ्गासहितको पहिरो खसेपछि काठमाडौँ जोड्ने यो मुख्य राजमार्ग ठप्प बनेको हो।

माथिबाट निरन्तर ढुङ्गा र पहिरो झर्ने क्रम जारी रहेकाले तत्काल पन्छाउन जोखिम र कठिनाइ भइरहेको छ। पहिरो पन्छाएर सडक सुचारु गराउन अझै केही समय लाग्ने धादिङका ट्राफिक प्रहरी प्रमुख शिशिर थापाले जानकारी दिनुभयो।

राजमार्ग अवरुद्ध भएसँगै काठमाडौँबाट बाहिरिँदै गरेका र काठमाडौँ भित्रिँदै गरेका सयौँ सवारी साधनहरू तथा यात्रीहरू १२ किलो क्षेत्रमा रोकिएका छन्।