काठमाडौँ । धादिङको नीलकण्ठ नगरपालिका–५ घर भई हाल ललितपुरको चुनिखेल बस्ने २२ वर्षीय नवीन आले मगर लागुऔषधसहित पक्राउ परेका छन्। ललितपुर महानगरपालिका–१८ वाइवाई चोकबाट प्रहरीको नियमित गस्ती टोलीले उनलाई नियन्त्रित लागुऔषध ट्रामाडोलसहित थप एक जनासँग नियन्त्रणमा लिएको हो।
नेपाल प्रहरीको केन्द्रीय समाचारकक्षका अनुसार देशका विभिन्न भागमा चलाइएको नियमित गस्ती तथा जाँचका क्रममा आले मगरसहित कुल १४ जनालाई विभिन्न प्रकारका प्रतिबन्धित लागुऔषधसहित नियन्त्रणमा लिइएको छ।
सोही क्रममा मकवानपुरको हेटौँडा उपमहानगरपालिका–११ थानाभर्याङबाट नियन्त्रित लागुऔषध ट्रामाडोलसहित चितवनको राप्ती नगरपालिका–१ का ३२ वर्षीय गोविन्द तामाङ र मकवानपुरको मनहरी गाउँपालिका–३ लामिटारका २४ वर्षीय सफल विक्रम राणा पक्राउ परेका छन्।
त्यस्तै झापाको मेचीनगर नगरपालिका–२ बाट खैरो हेरोइनजस्तो देखिने पदार्थसहित सोही ठाउँका ३९ वर्षीय मिलन मेचेसहित चार जनालाई प्रहरीले नियन्त्रणमा लिएको छ। कञ्चनपुरको बेलौरी नगरपालिका–१ फटैया खल्लाबाट ब्राउनसुगरजस्तो देखिने पदार्थसहित पुनर्वासका ३० वर्षीय विशाल विक र कैलालीका २२ वर्षीय कुशल चौधरी पक्राउ परेका छन्।
यसैगरी सुनसरीको इटहरी उपमहानगरपालिका–१ हलगडा चोक र बरगाछी क्षेत्रबाट ट्रामाडोल र डाइक्लोमाइनसहित पर्शुराम गुरुङ र उज्ज्वल बुढाथोकी पक्राउ परेका छन्। उनीहरूका साथबाट प्रहरीले दुई वटा मोटरसाइकलसमेत बरामद गरेको छ।
उदयपुरको बेलका नगरपालिका–८ कोठुबाट नाइट्राजेपामसहित सरोज बर्देवा तथा तनहुँको भिमाद नगरपालिका–६ शान्तिनगरमा डेरा गरी बस्ने ३१ वर्षीय शिव मल्ललाई फेनारगन, डाइजेपाम र बुप्रेनोर्फिनसहित पक्राउ गरिएको प्रहरीले जनाएको छ। पक्राउ परेका सबैजनामाथि आवश्यक अनुसन्धान भइरहेको छ।
