रुवीभ्यालीको हिन्दुङमा हिमपातमा परी २०० भेडा सहित २ जना बेपत्ता

1039 पटक पढिएको

प्रकाशित मिति: २०७५, १३ माघ आईतवार २०:१०

सम्पादक: धादिङ न्यूज

 

 

धादिङ । उत्तरी धादिङको रुवीभ्याली गाउँपालिका ४ हिन्दुङमा लगातारको हिमपातपछि बेपत्ता भएका २ जना भेडागोठालाको अवस्था अझै थाहा हुन सकेको छैन । रुवीभ्याली गाउँपालिकाको केन्द्र सेर्तुङबाट ६ घण्टाको पैदल दूरीमा रहेको हिन्दुङमा करिब २ सय भेडासहित २ गोठाला बेपत्ता भएको स्थानीयवासीले जानकारी दिएका छन् ।

बेपत्तामा हुनेमा स्थानीय १७ वर्षीय धनबहादुर तामाङ र उनका ४२ वर्षीय भिनाजु नुर्बु तामाङ रहेको प्रहरीले जनाएको छ । उक्त क्षेत्रमा शुक्रबारदेखि लगातार हिउँ परिरहेको र आइतबार पनि बिहानैदेखि बाक्लो हिमपात भइरहेका स्थानीयले जनाएका छन् ।

हिमपातबाट बच्न उनीहरु ओढारमा गएको बेला पहिरो गइ पुरिएको आशंका गरिएको छ। भेडा सहित सालाभेना बेपत्ता भएपछि स्थानीयले प्रहरीलाई खबर गरेका थिए। बेपत्ताको खोजीका लागि सेर्तुङचौकीबाट प्रहरी परिचालन गरिएको जिल्ला प्रहरी कार्यलय धादिङले जानकारी दिएको छ। सदरमुकाम धादिङवेशीबाट बेपत्ताको खोजीका लागि सहायक प्रमुख जिल्ला अधिकारी द्योलकराज ढकाललाई हेलिकप्टरमार्फत पठाइएको प्रमुख जिल्ला अधिकारी भागिरथ पाण्डेले जानकारी दिएका छन् ।

यसैबीच, धादिङका सांसद जगत सिंखडा र पूर्वमन्त्री बुद्धिमान तामाङ घटनास्थल पुगेर अवलोकन गरेका छन् ।

– अन्नपूर्ण पोष्टबाट । फोटो सौजन्य : जस थापा तामाङ



धादिङ जिल्लाको पहिलो अनलाइन खबर पत्रिका धादिङ न्यूज डट कम बिक्रम सम्वत २०७० साल जेठ २ गते तदनुसार सन २०१३ मे १६ देखि सञ्चालनमा आएको हो ।

२०७५, १३ माघ आईतवार २०:१० मा प्रकाशित