काठमाडौं । जनता समाजवादी पार्टी (जसपा)का अध्यक्ष उपेन्द्र यादवले आफ्नो पार्टी कम्युनिष्ट नभएको बताउनुभएको छ ।

सामाजिक सञ्जालमार्फत अध्यक्ष यादवले सैद्धान्तिक रुपले जसपा सामाजिक लोकतान्त्रिक पार्टी भएको र कम्युनिष्ट पार्टी हुन नसक्ने बताउनुभयो ।

साम्यवादी मोर्चामा जसपा रुपान्तरित हुन नसक्ने भन्दै आफू पहिचानसहितको संघीयता, सुशासन, समानता, स्वतन्त्रता, सामाजिक आर्थिक न्याय र समाजवादप्रति आस्था रहेको उल्लेख गर्नुभयो ।

यसबाट भ्रमित र दुविधामा नरहन समेत यादवले आम समाजवादीहरुलाई अपिल गर्नुभयो । साथै हाम्रो समाजमा रहेको गरिबी, अशिक्षा, बेरोजगारी, सामाजिक, आर्थिक शोषण, उत्पीडनका साथै वर्गीय, जातीय र लिङ्गका आधारमा कायम रहेका असमानता र विभेदलाई उन्मुलन गर्दै लैजाने उहाँले बताउनुभयो ।