काठमाण्डौ – ४ पटकको च्याम्पियन अमेरिकालाई पेनाल्टी शुटआउटमा हराउँदै स्विडेन फिफा महिला विश्वकप फुटबलको क्वाटरफाइनलमा प्रवेश गरेको छ ।

आज आइतवार अस्ट्रेलियाको मेलबर्न स्टेडियममा भएको खेलमा अमेरिकालाई पेनाल्टी शुटआउटमा ५–४ गोलले हराउँदै स्विडेन क्वाटरफाइनलमा पुगेको हो । निकै प्रतिस्पर्धात्मक खेलमा ९० मिनेटसम्म दुवै टोलीबाट गोल हुन नसकेपछि अतिरिक्त ३० मिनेट थप गरिएको थियो । थपिएको समयमा पनि गोल हुन नसकेपछि खेल पेनाल्टी शुटआउटमा पुगेको हो ।

अब स्विडेनले क्वाटरफाइनलमा जापानसँग अगस्ट ११ मा खेल्नेछ । जापानले शनिवार नर्वेलाई ३–१ गोलले हराउँदै क्वाटरफाइनलमा पुगेको थियो ।

अमेरिका सन् १९९१, १९९९, २०१५ र २०१९ को विजेता हो । स्विडेनले भने एकपटक पनि उपाधि जित्न सकेको छैन ।