धादिङ न्यूज
५ मंसिर सोमबार २०८० ।

महेशदोभान– हरिबोधिनी एकादशीको अवसरमा पारेर धादिङ जिल्लाको गल्छी गाउँपालिका वडा नम्बर ६ महेशदोभानमा रहेको अम्लेश्वर महादेव मन्दिरमा लाग्ने एकादशी मेलाको तयारी पुरा भएको छ ।

ठूलो एकादशीका नामले चिनिने हरिवोधिनी एकादशीको अवसरमा अम्लेश्वर महादेव मन्दिरको दर्शन तथा पूजाआजा गर्न बर्षेनी दर्शनार्थीको ठूलो भीड लाग्ने गर्दछ । यो बर्ष मंसिर ६ गते राती र ७ गते मन्दिरमा मेला लाग्ने भएको छ । मेलालाई सभ्य र व्यवस्थित बनाउन  सरोकारवाला निकायहरु संग समन्वय र सहकार्य गरी अम्लेश्वर महादेवस्थान संरक्षण तथा पर्यटन विकास समितिले विभिन्न तयारी पुरा गरेको जनाएको छ । समितिका सचिव सुजन दहालका अनुसार यो बर्षको मेलाको अवसर पारेर मन्दिर क्षेत्रमा विभिन्न पूर्वाधार तयार पार्न सहयोग गर्ने दाताहरुलाई सम्मान गरिने भएको छ ।

परिवार तथा आफन्तहरुको मृत्यु भएकाहरुले मृतकको सम्झनामा हरेक बर्षको हरिवोधिनी एकादशीको अघिल्लो राती यस मन्दिरमा रातभरी जाग्राम वसी वत्ती वाल्ने प्रचलन रहेको छ । यसरी बत्ती वाल्दा मृतात्माले शान्ति पाउने विश्वास रहि आएको छ । भगवान् विष्णुलाई पुज्ने दिनका रुपमा रहेको हरिबोधिनी एकादशीका दिन अम्लेश्वर महादेवको मन्दिरमा २ सय ५० वर्षअघिदेखि नै मेला लाग्दै आएको किंवदन्ती रहेको स्थानीय बुढापाकाहरुको भनाई छ ।

तत्कालीन राजा पृथ्वीनारायण शाह नेपाल एकिकरणका क्रममा यस ठाउंमा आई वास वसेको वेला सपनामा हातभरी सयौं औला भएका भगवानले शाहलाई आर्शिवाद दिएको र सो आर्शिवाद पुरा भएपछि पृथ्वीनारायण शाहले सोही ठाउंमा मन्दिर वनाएर छाडेको विश्वास गरिन्छ । काठमाण्डौंको चारनारायण स्थान जान नसक्ने हरुले यस मन्दिरमा आएर पुजाआजा गर्ने गर्दछन ।

गोसाईकुण्डवाट बगेर आएको त्रिशूली नदीको किनारमा रहेका कारण मन्दिर क्षेत्रलाई पबित्र स्थलका रुपमा लिने गरिन्छ । हरिबोधिनी एकादशीको दिन पूजा गर्नाले मनोकांक्षा पूरा हुने र परिवारमा बिरामी नहुने धार्मिक विश्वास समेत रहेको छ । मन्दिरमा पुजाआजा पछि कतिपय भक्तजनले भाकल अनुसारको फुलको डोली समेत चढाउने गर्दछन ।

ठुलो एकादशी भनेर चिनिने हरिवोधिनी एकादशीका दिन ढिकी, जाँतो नचलाइने र चलाएमा भगवान् महादेवको अवमूल्यन हुने भएकाले कन्दमूल तथा फलफूल खाने चलन रहेको छ ।

अम्लेश्वर महादे मन्दिर क्षेत्रलाई धार्मिक पर्यटन क्षेत्रका रुपमा विकास गर्न स्थानीयवासी सक्रिय भएर लागि परेका छन ।