काठमाडौं । अण्डर नाइन्टिन विश्वकप क्रिकेटको सुपर सिक्समा आज नेपाल र बंगलादेश भिड्दैछन् ।

खेल दक्षिण अफ्रिकाको ब्लुमफोन्टेन शहरमा नेपाली सयम अनुसार दिउँसो पौने दुई बजे सुरु हुनेछ । खेल जित्दै सुपर सिक्समा अंकको खाता खोल्ने नेपालको लक्ष्य रहेको छ । तर यो खेल जितेपनि नेपाल सेमिफाइनलमा पुग्ने होडबाट भने बाहिरिसकेको छ ।

सुपर सिक्स चरणमा नेपालले बंगलादेश र भारतसँग एक एक खेल खेल्नेछ । दुवै खेल जितेपनि नेपालको चार अंक हुनेछ । तर भारत र पाकिस्तानको अहिले नै ६–६ अंक भइसकेको छ ।

सुपर सिक्समा नेपाल रहेको समुहमा भारत, पाकिस्तान, बंगलादेश, न्युजिल्याड र आयरल्याण्ड पनि छन् । तर समुहका सबै टोलीले सबैसँग भने खेल्दैनन् ।

लिग चरणमा एकआपसमा खेलिएका खेलका परिणाम पनि यसमा गणना हुनेछ । नेपालले समुह चरणमा अफ्गानिस्तानलाई मात्रै हराएको तर अफ्गानिस्तान सुपर सिक्समा नभएकोले उक्त खेलबाट नेपालले पाएको दुई अंक सुपर सिक्समा गणना हुनेछैन ।

भारत, पाकिस्तान, न्युजिल्याण्ड र बंगलादेशले समुह चरणमा पाएको अंक भने सुपर सिक्समा पनि थपिने भएकोले नेपाल सेमिफाइनलमा पुग्न नसक्ने निश्चित भएको हो ।