धादिङ,१८ चैत २०८१ । राजतन्त्रको भण्डाफोर, संघीय लोकतान्त्रिक गणतन्त्रको संरक्षण र सम्वद्र्धनका लागि  जागरण सन्देश दिन नेकपा एमाले  धादिङले जिल्लाको गल्छी गाउँपालिका वडा नम्बर ६ महेशदोभानमा  जागरण सभा सम्पन्न गरेको छ ।

पृथ्वीराजमार्गमा जुलुस प्रदर्शनपछि महेशदोभान स्थित अम्लेश्वर महादेव मन्दिर परिसरमा भएको जागरण सभालाई सम्बोधन गर्दे नेकपा एमालेका केन्द्रिय सचिव पद्मा अर्याल, केन्द्रिय सदस्य एवम् धादिङ इन्चार्ज खेम प्रसाद लोहनी, जिल्ला अध्यक्ष भूमी प्रसाद त्रिपाठीले जनताको अभिव्यक्ति स्वतन्त्रतामा बन्देज लगाउने, जनताको अधिकार हनन् गर्ने जस्ता हर्कतका कारण नेपालको राजतन्त्र इतिहासमा सिमित भएको चर्चा गर्दै राजतन्त्र फर्काउने प्रतिगामी शक्तिहरुको प्रपञ्च केवल अब सपनामा मात्रै सिमित हुने चेतावनी दिएका थिए ।

मरिसकेको राजतन्त्र व्युउँताउने नाममा एउटा स्वार्थी जमात ठाउँ ठाउँमा नारा लगाउँदै देशमा फेरी अराजकता सिर्जना गर्न खोजीरहेको वक्ताहरुको भनाई थियो । राजतन्त्रकै कारण देश विकासमा धेरै वर्षपछि परेको धारणा व्यक्त गर्दै नेताहरुले भने, ‘राजतन्त्र फर्काउने नाममा देशलाई अद्योगतितर्फ धकेल्ने केही अराजक तत्वहरु सल्बलाउन थालेका छन्, उनीहरु कहिल्यै सफल हुँदैनन् । ’नेपालमा लोकतान्त्रिक गणतन्त्रको विकल्प नभएको नेताहरुको भनाई थियो ।

नेकपा एमाले केन्द्रिय सचिव एवं पुर्व भुमि सुधार मन्त्री पद्मा अर्यालले नेपाली जनताले फालेको राजतन्त्र कहिल्यै फर्किन नसक्ने दावी गर्नुभयो । राजावादीले चैत्र १५ गते गरेको अराजक र हिंसात्मक आन्दोलनको घोर भत्सर्ना गर्दै अर्यालले राजा फेरी सत्तामा आउने कुराको कल्पना समेत गर्न नसकिने दावी गर्नु भयो ।नेपाली जनताले चाहेको समृद्व र समाजवादी मुलुकको यात्रालाई कसैले रोक्न नसक्ने बताउँदै मुलुकमा भईरहेका प्रतिगामी हर्कतविरुद्व अब जनता जागरुक हुनुपर्नेमा नेता अर्यालले जोड दिनु भयो ।

गणतन्त्रको रक्षा, विकास र अराजक गलत प्रबृत्ति विरुद्ध नेकपा एमाले धादिङले आयोजना गरेको जागरण सभालाई सम्बोधन गर्नुहुँदै नेता अर्यालले राजाको पालामा सिटामोल खान नपाएर नेपाली जनताले मृत्युवरण गर्नुपरेको तथ्य आम नागरिकले बुझ्नुपर्ने स्पष्ट पार्नुभयो ।

जनसभालाई सम्बोधन गर्नुहुँदै नेकपा एमालेका केन्द्रिय सदस्य एवं धादिङ ईन्चार्ज खेम प्रसाद लोहनीले राष्ट्रिय प्रजातन्त्र पार्टी पुर्व राजाको पछाडी सति जान लागेको धारण राख्नुभयो । चैत १५ गते भएको आन्दोलनको सम्पूर्ण जिम्मा पुर्व राजा ज्ञानेन्द्रले लिनुपर्ने उहाँले बताउनुभयो । सभालाई संबोधन गर्दै नेकपा एमालेका केन्द्रीय सदस्य तथा धादिङ जिल्ला इन्चार्ज खेम प्रसाद लोहनीले राजावादीको आन्दोलनमा देखिएको अराजकतामा संलग्नहरुलाई कानून बमोजिम कार्बाही गर्नुपर्ने बताउनुभयो । त्यस्तै नेकपा एमाले धादिङका अध्यक्ष भुमी प्रसाद त्रिपाठीले अँध्यारो मन पराउने तत्वहरुले देशमा भ्रमको खेती गरिरहेको बताउनुभयो । ईतिहास कहिल्यै नर्फकने भन्दै त्रिपाठीले उज्यालोको विकल्पमा अध्यारो हुन नसक्नेमा जोड दिनुभयो ।

कार्यक्रममा एमालेका केन्द्रिय सदस्य जानुका सिम्खडा,नेताहरु जगन्नाथ नेपाल, डा.रामकुमार अधिकारी, रामप्रसाद अधिकारी, कृष्णप्रसाद अर्याल, नरेश खतिवडा, रमेश आचार्य लगायतका नेताहरुको आतिथ्य रहेको थियो ।

जागरण सभामा नेकपा एमाले धादिङका जिल्ला कमिटीका पदाधिकारी तथा सदस्यहरु, धादिङबाट प्रदेश कमिटीका सदस्यहरुका साथै जिल्लाको धुनिबेसी, थांक्रे, गल्छी, गजुरी,वेनिघाटरोराङ र सिद्धलेक पालिकाका नेता,  कार्यकर्ताहरुको सहभागिता रहेको थियो ।