अमेरिका- फिफा विश्वकप २०२६ को समूह ‘जे’ अन्तर्गत गएराति सम्पन्न निकै रोमाञ्चक प्रतिस्पर्धामा अर्जेन्टिनाले अष्ट्रियालाई २–० गोलअन्तरले पराजित गर्दै प्रतियोगिताको नकआउट चरण (अन्तिम ३२) मा आफ्नो स्थान सुरक्षित गरेको छ। अमेरिकाको डालास स्टेडियममा उपस्थित हजारौँ समर्थकका सामु अर्जेन्टिनी कप्तान लियोनल मेस्सीले व्यक्तिगत दुई गोल गर्दै आफ्नो टोलीलाई सानदार जित दिलाएका हुन्।

खेलको सुरुवाती क्षणबाटै दुवै टोलीले उच्च प्रतिस्पर्धात्मक खेल प्रदर्शन गरेका थिए। खेलको नवौँ मिनेटमै अर्जेन्टिनाले पेनाल्टीको अवसर प्राप्त गरेको थियो, तर कप्तान मेस्सीको प्रहार बाहिरिँदा समर्थकहरू केही निराश बनेका थिए। त्यसपछिको समयमा अष्ट्रियाले अर्जेन्टिनाको बलियो रक्षापंक्तिलाई चुनौती दिने प्रयास गर्‍यो। तर, खेलको ३८औँ मिनेटमा मेस्सीले विपक्षी डिफेन्डरहरूलाई छक्याउँदै सुन्दर गोल गरेपछि अर्जेन्टिनाले १–० को अग्रता लियो।

दोस्रो हाफमा अष्ट्रियाले खेल बराबरीमा ल्याउन निकै जोडबल गर्‍यो। अष्ट्रेलियाली मिडफिल्डरहरूले बल नियन्त्रणमा राख्दै पटक-पटक अर्जेन्टिनाको पोस्टमा प्रहार गरे पनि अर्जेन्टिनी गोलरक्षक र डिफेन्डरहरूले उत्कृष्ट प्रदर्शन गर्दै गोल हुन दिएनन्। खेलको अन्तिम समयसम्म १–० को झिनो अग्रतामा रहेको अर्जेन्टिनाका लागि इन्जुरी समयको पाँचौँ मिनेटमा मेस्सीले व्यक्तिगत दोस्रो गोल गर्दै जित सुनिश्चित गरे।

आजको खेल अर्जेन्टिनी कप्तान मेस्सीका लागि निकै विशेष रह्यो। दुई गोल गरेसँगै उनले विश्वकप फुटबलको इतिहासमा सर्वाधिक गोल गर्ने कीर्तिमान आफ्नो नाममा लेखाएका छन्। यसअघि जर्मनीका मिरोस्लाभ क्लोजले १६ गोल गर्दै राखेको कीर्तिमानलाई पछि पार्दै मेस्सीले आफ्नो व्यक्तिगत गोल संख्या १८ पुर्‍याएका छन्। खेलपछि सञ्चारकर्मीसँग कुरा गर्दै मेस्सीले यो सफलता सम्पूर्ण अर्जेन्टिनी जनता र आफ्ना समर्थकहरूलाई समर्पित गरेको बताए।

अर्जेन्टिनाका मुख्य प्रशिक्षकले खेलपछिको पत्रकार सम्मेलनमा टोलीको प्रदर्शनप्रति सन्तुष्टि व्यक्त गरे। उनले भने, “हामीले समूह चरणका दुवै खेलमा उत्कृष्ट लय देखाएका छौँ। मेस्सीको व्यक्तिगत प्रतिभासँगै आजको खेलमा सिङ्गो टोलीले देखाएको धैर्य र अनुशासन नै हाम्रो जितको मुख्य आधार हो।”

यस जितसँगै अर्जेन्टिना समूह ‘जे’ मा दुई खेलबाट ६ अङ्क जोड्दै शीर्ष स्थानमा रहेको छ। यसअघिको पहिलो खेलमा अल्जेरियालाई पराजित गर्दा मेस्सीले ह्याट्रिक गरेका थिए। समूहको अर्को खेलमा पराजित अष्ट्रियाको दुई खेलबाट ३ अङ्क छ। यस समूहमा रहेका जोर्डन र अल्जेरिया भने हालसम्म अङ्कबिहीन रहेका छन्। अर्जेन्टिनाले अब समूह चरणको अन्तिम खेलमा जोर्डनको सामना गर्नेछ। समूह विजेताका रूपमा अर्को चरणमा प्रवेश गर्ने लक्ष्यसहित मैदान उत्रने तयारीमा रहेको अर्जेन्टिनाको वर्तमान लय हेर्दा यसपटक टोली उपाधिको बलियो दाबेदार देखिएको छ।