काठमाडौँ, २२ असारः विश्व फुटबलको महाकुम्भ फिफा विश्वकप २०२६ मा एक अप्रत्याशित र रोमाञ्चक नतिजा सार्वजनिक भएको छ। स्टार स्ट्राइकर एर्लिङ हालान्डको उत्कृष्ट र जादुमय प्रदर्शनको मद्दतले नर्वेले पाँचपटकको ऐतिहासिक विश्वकप विजेता ब्राजिललाई स्तब्ध पार्दै क्वाटरफाइनलको यात्रा तय गरेको छ। उपाधि दाबेदार मानिएको बलियो ब्राजिल फुटबल इतिहासकै एउटा बिर्सनलायक हार ब्यहोर्दै विश्वकपको उपाधि होडबाट बाहिरिन पुगेको छ।

अमेरिकाको न्युयोर्कस्थित न्युजर्सी स्टेडियममा आज सम्पन्न निकै प्रतिष्पर्धात्मक र तनावपूर्ण खेलमा नर्वेले ब्राजिलमाथि २–१ गोलअन्तरको ऐतिहासिक जित दर्ता गर्‍यो। खेलको पहिलो हाफमा दुवै टोलीले निकै आक्रामक रणनीति अपनाए पनि बललाई जाली चुमाउन सकेका थिएनन्। ब्राजिलले बल पोजेसनमा अब्बल प्रदर्शन गर्दै नर्वेको रक्षापंक्तिमाथि लगातार दबाब सिर्जना गरे पनि गोल गर्न असफल भइरहेको थियो। रक्षात्मक रूपमा बलियो देखिएको नर्वेले दोस्रो हाफमा भने आफ्नो रणनीति बदल्दै काउन्टर अट्याकमा जोड दिएको थियो, जुन उसका लागि फलदायी साबित भयो।

नर्वेलाई ऐतिहासिक जित दिलाउने क्रममा टोलीका मुख्य हतियार मानिएका एर्लिङ हालान्ड नायक बने। उनले खेलको दोस्रो हाफको अन्तिम समयमा ११ मिनेटको अन्तराल भित्र दुईवटा सानदार गोल गर्दै खेलको पासो नै पल्टाइदिए। ब्राजिलको बलियो रक्षापंक्तिलाई तोड्दै खेलको ७९औँ मिनेटमा हालान्डले नर्वेका लागि पहिलो गोल गरेका थिए। आन्द्रेस सेलड्रुपको उत्कृष्ट र सटिक पासलाई सदुपयोग गर्दै हालान्डले घरेलु समर्थकलाई खुसीयाली मनाउने अवसर दिएका थिए।

पहिलो गोल खाएपछि बराबरीका लागि निकै आक्रामक बनेको ब्राजिलमाथि नर्वेले पुनः अर्को ठुलो धक्का दियो। खेलको निर्धारित ९०औँ मिनेटमा हालान्डले ब्यक्तिगत र टोलीका लागि दोस्रो गोल गर्दै नर्वेको जित निश्चित गरे। यो गोलसँगै ब्राजिलियन खेलाडी र समर्थकहरू स्तब्ध बनेका थिए। खेलको इन्जुरी समयमा ब्राजिलले पेनाल्टीको अवसर पाएको थियो। खेलको अन्तिम समयमा प्राप्त पेनाल्टीलाई स्टार खेलाडी नेइमारले गोलमा परिणत गर्दै खेललाई २-१ को स्थितिमा ल्याए पनि त्यो ब्राजिलको पुनरागमनका लागि निकै ढिला भइसकेको थियो। नेइमारको गोल लगत्तै रेफ्रीले खेल सकिएको सिट्टी बजाएपछि नर्वेले ऐतिहासिक उत्सव मनाएको थियो भने ब्राजिलियन खेलाडीहरू मैदानमै भावुक बनेका थिए।