परिषद्ले निर्वाचन अधिकृतमा न्याय सेवाका द्वितीय श्रेणीका १० अधिकृतलार्ई जगेडाका रूपमा समेत सिफारिस गरेको छ । निर्वाचन आयोगले २ सय ४० निर्वाचन क्षेत्रका अतिरिक्त थप १० अधिकृतको समेत नामावली मागेपछि परिषद्ले यस्तो व्यवस्था गरेको हो । परिषद्को यो परामर्शसहितको सिफारिसपछि देशभर कुल २ सय ५० निर्वाचन अधिकृत खटिनेछन् । जगेडाका १० अधिकृतलाई भने भैपरी आउने अप्ठ्यारो अवस्थामा आवश्यकताअनुसार परिचालन गरिने निर्वाचन आयोगले जनाएको छ । यसरी थपिएका १० जना भने सहसचिवसरहका अधिकृत छन् । उनीहरूलार्ई आवश्यकताअनुसार प्रमुख अधिकृत र अधिकृतका रूपमा खटाउन सकिने परिषद्ले सुझाव दिएको छ । परिषद्को परामर्शमा खटिएका निर्वाचन अधिकृतलार्ई कुन क्षेत्रमा खटाउने भन्ने निर्णय निर्वाचन आयोगले नै गर्ने परिषद्ले जनाएको छ ।

‘प्रमुख निर्वाचन अधिकृत र न्यायाधीशबाट पठाइएका अधिकृतलार्ई न्यायाधीश रहेको सम्बन्धित जिल्लामै खटाउन उपयुक्त हुने परामर्शसमेत हामीले आयोगमा पठाएका छौं । यसबाहेक अधिकृत साथीहरूलाई भने सकेसम्म सम्बन्धित जिल्ला र अन्यत्र खटाउन परे आवश्यकताअनुसार आयोगले नै गर्न सक्ने खालको सुझाव परिषद्ले पठाएको हो,’ कामु सचिव गिरीले भने ।