धादिङ- सभामुख डोल प्रसाद अर्यालले राष्ट्रिय गौरवको बूढीगण्डकी जलाशययुक्त जलविद्युत् आयोजनाको निर्माण कार्य केही महिनाभित्रै सुरु हुने बताउनुभएको छ। नेपाल पत्रकार महासंघ, जिल्ला शाखा धादिङले आइतबार आफ्नै सभाहलमा आयोजना गरेको बधाई तथा सम्मान कार्यक्रममा बोल्दै सभामुख अर्यालले लामो समयदेखि चर्चामा रहेको यो आयोजना अब व्यवहारिक कार्यान्वयनको चरणमा प्रवेश गर्न लागेको स्पष्ट पार्नुभयो। उहाँले शिलान्यास मात्र नभई निर्माणसँग सम्बन्धित सबै गतिविधिहरू एकैसाथ अघि बढ्ने बताउँदै आयोजनाको तयारी अन्तिम चरणमा पुगेको जानकारी दिनुभयो।

धादिङ र गोरखा जिल्लाको साझा चासोको विषय रहेको बूढीगण्डकी आयोजनालाई आफूले सधैँ उच्च प्राथमिकतामा राखेको उल्लेख गर्दै सभामुख अर्यालले यसको सफल कार्यान्वयनका लागि निरन्तर पहल गर्ने प्रतिबद्धता व्यक्त गर्नुभयो। “अब धेरै समय कुर्नु पर्दैन, आयोजना छिट्टै निर्माण प्रक्रियामा जान्छ,” उहाँले भन्नुभयो। धादिङको ज्वालामुखी गाउँपालिका वडा नम्बर २, गैरीगाउँ (मैदी) मा जन्मिएर सभामुख जस्तो उच्च संवैधानिक पदमा पुग्नुभएका अर्यालले गृह जिल्लालाई विशेष प्राथमिकतामा राखेर योजनाबद्ध विकासका काम अघि बढाइने समेत बताउनुभयो।

देशको दिगो विकासका लागि निजी क्षेत्र र सरकारबीचको सहकार्य अपरिहार्य रहेको औँल्याउँदै उहाँले विकास निर्माणका काममा सुशासन र पारदर्शिता सुनिश्चित गरिने बताउनुभयो। संविधान कार्यान्वयनका लागि आवश्यक कानुन निर्माण र संशोधनलाई तीव्रता दिने उल्लेख गर्दै उहाँले भन्नुभयो, “जनताले प्रत्यक्ष अनुभूति गर्ने गरी ‘फास्ट ट्र्याक’ बाट कानुन निर्माण प्रक्रिया अघि बढाइनेछ। विकास, समृद्धि र खुसीको अनुभूति ढिला नगरी दिलाउनुपर्छ भन्ने मेरो मान्यता हो।”

कार्यक्रममा नेपाल पत्रकार महासंघ धादिङका अध्यक्ष सीताराम अधिकारीले जिल्लाभरका पत्रकारहरूको तर्फबाट सभामुख अर्याल र धादिङ क्षेत्र नम्बर २ बाट निर्वाचित सांसद बोध नारायण श्रेष्ठलाई सम्मान गर्नुभएको थियो। सो अवसरमा महासंघले राम्रा नीति र कानुन बनाउन तथा सकारात्मक कुराहरू लिपिबद्ध गर्नका लागि सभामुख र सांसदलाई डायरी उपहार स्वरूप प्रदान गरेको थियो। सभामुख अर्यालले आफू निष्पक्ष, इमानदार र जिम्मेवार भूमिकामा रहेर जनताको हितमा काम गर्ने प्रतिबद्धता दोहोर्‍याउँदै आफ्नो कार्यकाललाई परिणाममुखी बनाउने विश्वास दिलाउनुभयो।