उर्मिला थपलिया, पूर्व केन्द्रीय सदस्य नेविसंघ
नेपाली कांग्रेसले नेपाल विद्यार्थी संघको महाधिवेशनका लागि सहमति दिइसकेको छैन, तर उर्मिला थपलियाले महामन्त्रीको उम्मेदवार बन्न तय भइसकेको आफ्नो विवाहको मिति तीनपटक सारिसकिन् । नेविसंघको राजनीति, पार्टीको अवस्था र व्यक्तिगत जीवनबारे उर्मिलासँग तरुणले गरेको कुराकानी :
० ‘कुन पदमा’ उठौं भनेर फेसबुकमा छलफल चलाउनु भएको थियो नि ?
– धेरैले अध्यक्षमै उठ्नुपर्छ भनेर सुझाव दिए । तर म आफूलाई महामन्त्रीको उम्मेदवारमा सजिलो महसुस गर्छु ।
० सभासद्को उम्मेदवार भइसक्नुभएको होइन र ?
– हो, जिल्लाले समानुपातिक उम्मेदवार त बनायो, तर केन्द्रले सभासद् बनाएन ।
० फेरि विद्यार्थी राजनीतिमै फर्किनु हुन्छ ?
– विद्यार्थी राजनीति गरें, त्यसको नेतृत्वमा पुग्न खोज्नु स्वाभाविक हो । निर्वाचित पदाधिकारी बनेर काम गर्ने इच्छा छ । त्यो इच्छा यो महाधिवेशनबाट प्राप्त हुनेछ भन्ने आशा राखेकी छु ।
० महाधिवेशन चाहिँ हुन्छ ?
– हुने भनेर मिति तोकिएर पटक–पटक रोकिएको अवस्था हो । यसपटक पनि हुँदैन कि भनेर शंका गर्नु स्वाभाविक हो । तर यसपटक महाधिवेशन हुन्छ भन्ने कुरामा म आशावादी छु ।
० के आधारले भन्दै हुनुहुन्छ यी कुरा ?
– अध्यक्ष रञ्जीत कर्ण सभासद् भइसकेका छन् । उनी यो पद जसरी भए पनि हस्तान्तरण गर्न चाहन्छन् । जिल्ला र क्याम्पसहरूमा अधिवेशन भइरहेको छ । त्यसकारण पनि अधिवेशन हुन्छ भन्ने लागेको छ ।
० पद हस्तान्तरण गर्न नेविसंघमा महाधिवेशन नै हुनुपर्छ र ?
– अधिवेशन नभई पद हस्तान्तरण भएको विगत नेविसंघसँग छ । यद्यपि यो इतिहास लेख्ने अवसर हो । यो अवसरलाई ऐतिहासिक बनाउनुपर्छ भन्ने मेरो मान्यता हो । अखिल र अखिल क्रान्तिकारी दुवैले नेतृत्व छनोट गरिसके । लोकतन्त्रिक पार्टी कांगे्रसले पनि टीके प्रथाको अन्त्य गरी खुला प्रतिस्पर्धाबाट नेतृत्व चयन हुने वातावरण बनाउनुपर्छ ।
० नेविसंघको अधिवेशन नगर्दा के हुन्छ कांगे्रसलाई ?
– नेविसंघ भनेको कांगे्रसको नेता उत्पादन गर्ने नर्सरी हो । नर्सरीमा घामपानी र मलजलको सन्तुलन मिलायो भने मात्र बिरुवा हुर्किन्छ । कांगे्रसले भ्रातृसंस्थाको अधिवेशन नगरेकै कारण नेतृत्व जाममा परेको छ ।
० नेविसंघलाई लोकतान्त्रिक पार्टीको भ्रातृसंस्था भन्न लाज लाग्नुपर्ने होइन ?
– बेइज्जतै भइसक्यो नेविसंघको । पार्टी लोकतान्त्रिक भन्ने अलोकतान्त्रिक चरित्र देखाउनाले यो लाजमर्दो स्थिति सिर्जना भएको हो । अखिलमा नवीना लामा मसँगैकी हुन् । उनी कहाँ पुगिन्, मेरो हैसियत पूर्वकेन्द्रीय सदस्यमै छ ।
० कसले गर्दा अधिवेशन नभएको ?
– कुनै एक व्यक्तिलाई दोष दिने ठाउँ छैन । पार्टीको शीर्ष नेतृत्व नै यसको जिम्मेवार हो । पार्टीमा जहिलेसम्म यो साठी र चालीसको भागबन्डा लगाइन्छ, तबसम्म यो समस्या रहिरहन्छ ।
० जसको हातमा कमान्ड छ, उसले जिम्मा लिनुपर्दैन ?
– पार्टीभित्र दुई खेमा छ, यो खेमाले जहिले पनि नेतृत्व मेरो मान्छे आउनुपर्छ भन्छ । अब यसरी पार्टी चल्दैन, नेतालाई गाली गरेर समस्या समाधान हुँदैन । त्यसैले शीर्ष नेतृत्वले यसको निकास दिन ढिला गर्नुहुँदैन ।
० तपाईं चाहिँ कुन गुटको ?
– यो प्रश्न नै मेरा लागि दुर्भाग्य हो । पार्टीभित्र यस्तो प्रश्न गर्ने वातावरण बन्न दिनु हुँदैन । म व्यक्ति चिन्दनँ, कांग्रेसको अनुशासित कार्यकर्ता हुँ ।
० कति भयो राजनीतिमा संलग्न भएको ?
– स्कुलको विद्यार्थी हुँदादेखि नै नेविसंघमा छु । ०५२ सालदेखि नै धादिङको नीलकण्ठ स्कुलबाट राजनीति प्रारम्भ गरें । त्यसबेला म ६ कक्षामा पढ्थें ।
० तपाईं अहिलेसम्म विद्यार्थी ?
– हो, अहिले विश्वभाषा क्याम्पसमा फ्रेन्च भाषा अध्ययन गर्दैछु । त्यसअघि रसियन भाषा पढें ।
० राजनीति गर्नकै लागि क्याम्पस भर्ना हुनुभएको हो ?
– केही न केही त गर्नैप¥यो नि । त्यत्तिकै बस्नुभन्दा कलेजमा अध्ययन गरे ज्ञान हासिल हुन्छ र सँगै राजनीतिलाई अघि बढाउन सकिन्छ ।
० फ्रेन्च भाषा सिकेर के गर्नुहुन्छ ?
– ज्ञान हासिल गर्नु आफैंमा राम्रो हो । यही काम गर्छु भनेर फ्रेन्च भाषा मैले सिकेकी होइन । भाषा, साहित्य र संस्कृतिको अध्ययनले जीवनमा धेरै कुराको अर्थ राख्ने रहेछ ।
० नेविसंघमा महामन्त्री भइछाड्ने ?
– भात, पानी तिर्खा नभनी देशभरि गएर संगठन गरियो । महामन्त्रीमा ग्यारेन्टी जित्छु भनेर लड्न लागेकी होइन । देशभरका साथीभाइमाझ मेरो अवस्था कस्तो रहेछ, जान्ने इच्छा छ ।
० के गर्नुभएको छ ?
– आफैंले बेलिविस्तार लगाउन सुहाउँदैन होला । तर मैले संगठनका लागि धेरै गरेको छु जस्तो लाग्छ । नेविसंघको अवधारणा, संगठन विस्तार र पार्टीका लागि जुझारु कार्यकर्ता उत्पादनका लागि मैले धेरै त्याग गरेकी छु ।
० राजनीतिबाहेक के गर्नुहुन्छ ?
– कांगे्रसको शुभेच्छुक संस्था लेखक संघको केन्द्रीय सदस्य पनि हुँ । मेरो चारवटा पुस्तक सार्वजनिक भइसकेका छन् भने दुईवटा निस्कने क्रममा छन् । मेरो पुस्तक हाम्रो पुस्ताकालय भन्ने अभियान सञ्चालन गरेका छौं । गाउँगाउँमा पुस्तक पुगोस् भन्ने उद्देश्यले हामीले यो अभियान सञ्चालन गरेका हौं ।
० विवाह गर्नुभयो ?
– गरेको छैन, तर इन्गेजमेन्ट भइसक्यो । यही नेविसंघको अधिवेशनले गर्दा तीनपटक विवाहको मिति सरिसकियो । अब असारमा चाहिँ पक्कै हुन्छ ।
० अधिवेशनले विवाहलाई के फरक पार्छ ?
– विवाह गरेपछि केही समय घरपरिवारलाई दिनुप¥यो । संगठनका लागि यति धेरै मेहनत गरेकी छु, अधिवेशनका बेला पारिवारिक समस्या आइनलागोस् भनेर विवाहको मिति तीनपटक सारेकी हुँ ।
० दुलाह सोझो परेछन् जस्तो छ ?
– त्यसो होइन, दुवैजनाको सहमतिमा मिति सारेका हौं । मेरो समस्यालाई उहाँले मनन गरिदिनुभएको हो ।
० दुलाहा कहाँ फेला पार्नुभयो ?
– उहाँले पहिलेदेखि नै मलाई मन पराउनुहुँदो रहेछ । उहाँ मोहन आचार्य । पार्टी सभापति तथा प्रधानमन्त्री सुशील कोइरालाको सहयोगी हुनुहुन्छ । महेन्द्र मरासनीमार्फत कुरा आयो, त्यसपछि मैले पनि उहाँलाई मन पराउन थालें ।
० मन पराउँन थाल्दा उहाँको बडिल्याङ्ग्वेज कस्तो थियो नि ?
– त्यो त म कसरी भन्न सक्छु । केटा मान्छेको हाउभाउ सबैलाई थाहा भएकै हो नि ।
० डाइरेक्ट प्रस्ताव राख्न सक्नु भएन छ नि ?
– नराखे पनि के भयो र । उहाँले मन पराउनुभयो, मैले पनि यत्तिको साथीबाट जीवनयात्रा सरल बनाउन सकिन्छ भन्ने निष्कर्ष निकालें । हामी दुवै सन्तुष्ट छौं ।
० मन बुझाउन डेटिङ जानुहुन्छ होला नि ?
– फुर्सद खोइ डेटिङ जाने ? उहाँ जहिले व्यस्त, म कहिले रुकुम पुगेकी हुन्छ, कहिले रोल्पा ।

-नेपाल व्रिटेन डट कमबाट